انسانی بنیادوں پر پاکستان نے بڑا قدام کرتے ہوئے  بھارتی ہائی کمیشن کو 2 مبینہ بھارتی جاسوسوں تک قونصلر رسائی فراہم کر دی۔

 سفارتی ذرائع کے مطابق  گزشتہ روز بھارتی ہائی کمیشن حکام کو جاسوسی کے الزام میں گرفتار بھارتی مقبوضہ کشمیر کے نوجوانوں تک قونصلر رسائی فراہم کر دی گئی۔

ذرائع کا کہنا ہے کہ بھارتی مقبوضہ کشمیر کے دو نوجوان فیروز احمد لون اور نور محمد وانی کو جاسوسی کے الزام میں گلگت بلتستان سے گرفتار کیا گیا تھا۔

فیروز احمد لون  کی عمر 29 برس جبکہ نور محمد وانی کی عمر 24 برس ہے۔دونوں کا تعلق مقبوضہ کشمیر میں بانڈی ہورہ کے علاقے گوریز سے ہے۔

سفارتی ذرائع کا کہنا ہے کہ بھارتی میڈیا کے مطابق دونوں نوجوان نومبر 2018 سے مقبوضہ کشمیر سے لاپتہ ہیں۔دونوں نوجوانوں کو غیر قانونی سرحد پار کرنے اور جاسوسی کے الزام میں گرفتار کیا گیا تھا۔

ذرائع کا مزید کہنا ہے کہ بھارت کی جانب سے قونصلر رسائی کی درخواست کے بعد پاکستان نے قونصلر رسائی فراہم کی ۔

سفارتی ذرائع کا کہنا ہے کہ گزشتہ روز دونوں قیدیوں کو گلگت بلتستان جیل سے اڈیالہ جیل راولپنڈی منتقل کیا گیا۔قونصلر رسائی ملنے کے بعد بھارتی سفارتخانے کے 3 رکنی وفد نے اڈیالہ جیل میں دونوں قیدیوں سے ملاقات کی۔

ذرائع کا کہنا ہے کہ بھارتی ہائی کمیشن کے وفد میں فرسٹ سیکرٹری وینکٹیش وارلو سدھارا،اسٹاف ممبر دھرووبرگجر اور پیتم سنگھ کرن شامل تھے۔

ملاقات کے دوران وزارت داخلہ کے افسران بھی موجود تھے۔