بھاری بلوں سے تنگ عوام کیلئے اچھی خبر آگئی ہے۔

سندھ حکومت نے عالمی بینک کے اشتراک سے صوبے بھر میں 2 لاکھ گھرانوں کو صرف 7 ہزار روپے کے عوض پورا سولر سسٹم فراہم کرنے کا فیصلہ کرلیا ہے۔

2 لاکھ گھرانوں میں کراچی کے 50 ہزار گھرانے بھی شامل ہیں۔ مجوزہ فراہم کردہ سولر سسٹم سے ایک پنکھا اور 3 ایل ای ڈی بلب جلائے جاسکیں گے۔

اس حوالے سے ڈائریکٹر سندھ سولر انرجی کا کہنا ہے کہ ہر صوبے کے ہر ضلع میں 6 ہزار 656 سولر سسٹم دیئے جائیں گے، منصوبے کا آغاز رواں سال اکتوبر سے متوقع ہے۔

انہوں نے کہا کہ سسٹم میں سولر پینلز، چارج کنٹرولر اور بیٹری شامل ہے، جیسے ہی خریداری ہوجائے گی تو اکتوبر میں تقسیم شروع ہو جائے گی۔

ڈائریکٹر سندھ سولر انرجی کا کہنا ہے کہ منصوبے کے لیے ورلڈ بینک نے 3 کروڑ 20 لاکھ ڈالر جاری کیے ہیں، منصوبے میں مزید توسیع کا بھی امکان ہے۔