شمالی کوریا نے اپنے روایتی حریف جنوبی کوریا کے خلاف انوکھا حملہ کیا ہے جس میں ایک بھی گولی اور بم نہیں چلا۔

شمالی کوریا نے جنوبی کوریا کی حدود میں کچرے سے بھرے کم از کم 260 غبارے گرائے ہیں جس کے بعد حکام نے اپنے رہائشیوں کو گھروں میں رہنے کی تنبیہ کی ہے۔

جنوبی کوریا کی فوج نے عوام کو خبردار کیا ہے کہ وہ سفید غبارے اور ان سے منسلک پلاسٹک کے تھیلوں کو چھونے سے گریز کریں کیونکہ ان میں گندا فضلہ اور کچرا ہے۔

یہ غبارے جنوبی کوریا کے نو میں سے آٹھ صوبوں میں پائے گئے ہیں اور اب ان کا تجزیہ کیا جا رہا ہے۔

شمالی اور جنوبی کوریا دونوں نے 1950 کی دہائی میں کوریائی جنگ کے بعد سے اپنی پروپیگنڈا مہموں میں غبارے کا استعمال کیا ہے۔

اس سے قبل جنوبی کوریا کی فوج نے کہا تھا کہ وہ اس بات کی تحقیقات کر رہی ہے کہ آیا ان غباروں میں شمالی کوریا کا کوئی پروپیگنڈا پمفلٹ موجود تھا یا نہیں۔

حالیہ واقعہ جنوبی کوریا کے سرگرم کارکنوں کی جانب سے شمالی کوریا کے سرحدی علاقوں میں بار بار پمفلٹ اور دیگر کچرا پھینکنے کے بعد سامنے آیا ہے۔

شمالی کوریا کے نائب وزیر دفاع کم کانگ ایل نے ایک بیان میں کہا کہ فضلے اور گندگی کے ڈھیر جلد ہی سرحدی علاقوں اندرونی حصے میں بکھر جائیں گے اور انہیں ہٹانے کے لیے کتنی کوششوں کی ضرورت ہے اس کا براہ راست تجربہ کیا جائے گا۔

سوشل میڈیا پر شیئر کی جانے والی تصاویر میں دیکھا جا سکتا ہے کہ ٹوائلٹ پیپر، سیاہ مٹی اور بیٹریوں سمیت سفید شفاف غباروں سے جڑے بیگ وں کو تار کے ذریعے منسلک کیا گیا ہے۔

جنوبی کوریا کی خبر رساں ایجنسی یون ہیپ نے خبر دی ہے کہ گرے ہوئے کچھ غباروں میں وہ فضلہ تھا جو اس کے گہرے رنگ اور بدبو کی وجہ سے ظاہر ہوتا ہے۔’

جنوبی کوریا کی فوج نے اس اقدام کی مذمت کرتے ہوئے اسے بین الاقوامی قانون کی صریح خلاف ورزی قرار دیا ہے۔