محکمہ موسمیات کے مطابق کراچی آج بھی ہیٹ ویو کی لپیٹ میں ہے اور پارہ 42 ڈگری سینٹی گریڈ چھونے کا امکان ہے جبکہ شہر میں مطلع جزوی ابر آلود، موسم گرم اور مرطوب ہے۔

شہر قائد کا موجودہ درجہ حرارت 30 ڈگری سینٹی گریڈ ہے جبکہ گرمی کی شدت 36 ڈگری سینٹی گریڈ تک محسوس کی جارہی ہے۔

کراچی شہر میں مغربی سمت سے 24 کلو میٹر فی گھنٹہ کی رفتار سے ہوائیں چل رہی ہیں جبکہ ہوا میں نمی کا تناسب 78 فیصد ہے۔

محکمہ موسمیات کے مطابق آئندہ چوبیس گھنٹوں کے دروان موسم گرم اور مرطوب رہے گا جبکہ گزشتہ روز سال کا گرم ترین دن کے طور پر ریکارڈ ہوا جس میں درجہ حرارت 41.5 ڈگری ریکارڈ کیا گیا۔

چیف میٹرولو جسٹ سردار سرفراز کا کہنا ہے کہ شہر قائد میں دو روز تک ہیٹ ویو برقرار رہے گی، ہوا میں نمی کا تناسب زائد ہونے سے شہر میں گرمی کی شدت زیادہ محسوس کی جا رہی ہے۔

سردار سرفراز کے مطابق دو جون سے کراچی کا مطلع جزوی ابر آلود رہنے کا امکان ہے اور درجہ حرارت 34 سے 36 ڈگری سینٹی گریڈ ترہنے کی توقع ہے۔

ماہرین کا کہنا ہے کہ ہیٹ ویو کے باعث شہری احتیاطی تدابیر اختیار کریں، بلا ضرورت گھروں سے باہر نہ نکلیں، پانی کا زیادہ سے زیادہ استعمال کریں۔

دوسری جانب ائیرکولیٹی انڈکس کے مطابق شہر کا فضائی معیار بہتر ہے جبکہ دنیا کے آلودہ ترین شہروں میں کراچی گیارہ  نمبر پر آگیا ہے تاہم پاکستان کے آلودہ ترین شہروں میں کراچی کا چوتھا نمبر ہے۔

اس کے علاوہ ائیرکولیٹی انڈکس کا کہنا ہے کہ ہوا میں آلودہ ذرات کی مقدار 97 پرٹیکیولیٹ میٹرز ریکارڈ کی گئی ہے۔