کلاڈیا شین بام میکسیکو کی تاریخ میں پہلی خاتون صدر منتخب ہوگئیں ہیں۔

میکسیکو کی آفیشل الیکٹورل اتھارٹی کے مطابق میکسیکو سٹی کی سابقہ 61 سالہ میئر کلاڈیا شین بام 58 سے 60 فیصد ووٹ حاصل کرکے میکسیکو کی تاریخ میں پہلی خاتون صدر منتخب ہوگئیں ہیں۔

رپورٹ کے مطابق کلاڈیا شین بام کو اپنی حریف بزنس وومین زوشل گلویز پر 30 فیصد ووٹوں کی برتری حاصل ہے۔ کلاڈیا شین بام یکم اکتوبر کو سبکدوش ہونے والے صدر اینڈرس مینوئل لوپیز کی جگہ لیں گی۔

محترمہ کلاڈیا شین بام توانائی کے شعبے سے تعلق رکھنے والی سائنسدان ہیں جب کہ انہوں نے وعدہ کیا ہے کہ وہ سابق صدر کی جانب سے شروع کیے گئے فلاحی پروجیکٹ کو مزید تقویت دینے کا ارادہ رکھتی ہیں۔

وکٹری اسپیچ کرتے ہوئے انہوں نے اپنے ووٹرز سے کہا ’’وہ میکسیکو کی 200 سالہ تاریخ میں پہلی خاتون صدر منتخب ہوئیں ہیں جوکہ میرے اور تمام خواتین کے لیے اعزاز کی بات ہے‘‘۔

ان کا کہنا تھا ’’جیسا کہ میں پہلے بھی بول چکی ہوں کہ یہ فتح صرف میرے اعلیٰ دفتر تک پہنچنے کے لیے نہیں بلکہ یہ ہم سب کے بارے میں ہے اور میں آپ کو ناکام نہیں ہونے دوں گی‘‘۔

واضح رہے کہ کلاڈیا شین بام 2018 میں میکسیکو سٹی کی پہلی خاتون میئر منتخب ہوئیں تھیں جب کہ 2023 میں انہوں نے صدارتی انتخاب کے لیے یہ عہدہ چھوڑ دیا تھا۔