ٹی 20 ورلڈ کپ میں بارش نے بھی اپنی انٹری کر دی ہے، انگلینڈ اور اسکاٹ لینڈ کے درمیان ہونے والا میچ بارش کی باعث منسوخ کر دیا گیا۔

ٹی 20 ورلڈ کپ 2024 گروپ بی میں آج انگلینڈ اور اسکاٹ لینڈ کے درمیان میچ برج ٹاؤن ویسٹ انڈیز میں کھیلا گیا، اسکاٹش کپتان نے ٹاس جیت کر پہلے بیٹنگ کا فیصلہ کیا۔

اسکاٹ لینڈ نے 7 اوورز میں بغیر کسی نقصان کے 51 رنز بنا لیے تھے مگر پھر کالی گھٹاؤں نے اسٹیڈیم کو اپنی لپیٹ میں لے لیا اور کافی دیر تک میچ کو روکا گیا۔

میچ میں بارش کے طویل خلل کی وجہ سے امپائر نے میچ کو فی اننگ 10 اوور تک محدود کر دیا تھا۔

بارش تھمتے ہی اسکاٹ لینڈ نے اپنی اننگ کا دوبارہ آغاز کیا اور مقررہ 10 اوورز میں بغیر کسی نقصان کے 90 رنز بنا لیے۔

اسکاٹ لینڈ کے اوپنرز مائیکل جونز نے 45 اور جارج مونسی نے 41 رنز کی ناقابل شکست اننگ کھیلی۔

میچ منتظمین کی جانب سے انگلینڈ کو جیت کے لیے ڈک ورتھ لوئس میتھڈ کے تحت 109 رنز کا ہدف ملا، مگر تیز بارش نے انگلینڈ کے خوابوں پر پانی پھیر دیا۔

بارش کے باعث انگلینڈ کی اننگ شروع نہ ہو سکی جس کے بعد امپائر نے میچ کو منسوخ کر دیا اور دونوں ٹیموں کو ایک ایک پوائنٹ دے دیا گیا۔

آئی سی سی ٹی 20 ورلڈ کپ میں آج ہونے والے پانچویں میچ میں افغانستان نے یکطرفہ مقابلے میں یوگنڈا کو 125 رنز سے شکست دی۔