سوڈان میں خانہ جنگی سے متاثر محصور شہر الفشر کا آخری شہری اسپتال بھی بند کر دیا گیا ہے۔

محصور سوڈانی شہر الفشر کے آخری کام کرنے والے اسپتالوں میں سے ایک کے ڈاکٹروں کا کہنا ہے کہ حملے کے بعد وہ اسپتال کو بند کرنے پر مجبور ہو گئے ہیں۔

اس اسپتال کو طبی خیراتی ادارے میڈیسنز سانز فرنٹیئرز (ایم ایس ایف) کی مدد حاصل ہے جس نے کہا تھا کہ یہ الفشر میں واحد ہسپتال ہے جہاں زخمی شہریوں کا علاج کیا جا سکتا ہے۔

کئی دنوں سے شہر کے ساؤتھ اسپتال پر گولے گرنے کی اطلاعات موصول ہو رہی تھیں جس کے نتیجے میں زخمی اور ہلاکتیں ہوئی تھیں۔

لیکن اب عینی شاہدین کا کہنا ہے کہ نیم فوجی ریپڈ سپورٹ فورس (آر ایس ایف) کے جنگجو اس مرکز میں داخل ہو گئے ہیں۔

عینی شاہدین کے مطابق آر ایس ایف کے جنگجو ہفتہ کے روز اسپتال پہنچے اور فائرنگ کی، انہوں نے منشیات اور طبی سامان لوٹ لیا، ایک ایمبولینس چوری کی اور عملے پر حملہ کیا۔

سوڈان میں طبی خیراتی ادارے کے عبوری سربراہ میکسیمیلین کوالسکی نے برطانوی خبر رساں ادارے کو بتایا کہ افراتفری کی وجہ سے ہماری ٹیم اس بات کی تصدیق کرنے سے قاصر رہی کہ کوئی ہلاک یا زخمی ہوا ہے یا نہیں۔

اسپتال کے طبی عملے نے چند روز قبل برطانوی خبر رساں ادارے کو بتایا تھا کہ وہ سیکیورٹی خدشات کے پیش نظر اسے دوسری جگہ منتقل کرنے کا منصوبہ بنا رہے ہیں۔ اسے 10 دنوں میں تین بار مارٹر گولوں اور گولیوں کا نشانہ بنایا گیا تھا۔

ایم ایس ایف کا کہنا ہے کہ جب ہفتے کے روز اس پر حملہ کیا گیا تو شکر ہے کہ صرف 10 مریض اور طبی ٹیم وہاں موجود تھی۔

طبی خیراتی ادارے سوڈان کے سربراہ نے بتایا کہ یہ اسپتال فرنٹ لائن کے بہت قریب ہے اس لیے یہ فی الحال بند رہے گا۔