ملاوی کے نائب صدر ساؤلوس چلیما اور نو دیگر افراد کو لے جانے والا طیارہ لاپتہ ہو گیا ہے۔

ملاوی ڈیفنس فورس کا طیارہ پیر کی صبح دارالحکومت لیلونگوے سے روانہ ہونے کے بعد ریڈار سے غائب ہوگیا، ایوی ایشن حکام کی جانب سے طیارے سے رابطہ نہ ہونے پر صدر نے سرچ اینڈ ریسکیو آپریشن کا حکم دے دیا ہے۔

حکام کے مطابق طیارے کو مقامی وقت کے مطابق 10:00 بجے کے بعد ملک کے شمال میں واقع مزوزو بین الاقوامی ہوائی اڈے پر اترنا تھا۔

طیارے میں سوار دیگر مسافروں میں نائب صدر ساؤلوس چلیما کی اہلیہ مریم اور ان کی یونائیٹڈ ٹرانسفارمیشن موومنٹ (یو ٹی ایم) پارٹی کے متعدد عہدیدار شامل ہیں۔

ڈیفنس فورس کے کمانڈر کی جانب سے واقعے کی اطلاع ملنے کے بعد ملاوی کے صدر لازارس چکویرا نے بہاماس جانے والی اپنی طے شدہ پرواز منسوخ کر دی۔

صدر کے دفتر کی جانب سے جاری بیان میں کہا گیا ہے کہ حقائق سامنے آنے کے بعد عوام کو صورتحال کے بارے میں کسی بھی پیش رفت سے آگاہ کیا جائے گا۔

جنرل ویلنٹینو فیری نے چکویرا کو بتایا کہ طیارے کی گمشدگی کی وجہ ابھی تک معلوم نہیں ہوسکی ہے۔ ملاوی کے وزیر اطلاعات موسیٰ کنکویو نے برطانوی خبر رساں ادارے کو بتایا کہ طیارے کی تلاش کے لیے کی جانے والی کوششیں جاری ہیں۔

نائب صدر ساؤلوس چلیما کابینہ کے سابق وزیر رالف کسمبرا کی تدفین میں حکومت کی نمائندگی کرنے جارہے تھے، جن کا تین روز قبل انتقال ہو گیا تھا۔

51 سالہ ساؤلوس چلیما سنہ 2014 سے جنوبی افریقی ملک کے نائب صدر ہیں۔