کراچی: بلدیہ عظمیٰ کراچی کا مالی سال 2024-25 کے لیے 49 ارب 70 کروڑ 18 لاکھ کا سالانہ بجٹ منظور کرلیا گیا۔

بلدیہ عظمیٰ کراچی کا مجوزہ بجٹ اجلاس میئر کراچی بیرسٹر مرتضیٰ وہاب کی زیرِ صدارت ہوا جس میں مالی سال 25-2024 کے لیے بجٹ پیش کیا گیا۔

بلدیہ عظمیٰ کراچی کا سالانہ بجٹ کی قرارداد کو کثرت رائے سے منظور کرلیا گیا یے جس کے بعد کونسل اجلاس کو غیر معینہ مدت کے لیے ملتوی کردیا گیا۔

خبر رساں ادارے کے مطابق بلدیہ عظمیٰ کراچی کے مجوزہ بجٹ کا حجم 49 ارب 70 کروڑ 18 لاکھ روپے ہے جب کہ بجٹ 9 کروڑ 99 لاکھ روپے سرپلس ہوگا۔

نئے مالی سال کے بجٹ میں فنڈز و آمدنی کا تخمینہ 49 ارب 70 کروڑ روپے جب کہ اخراجات کا تخمینہ 49 ارب 60 کروڑ روپے لگایا گیا ہے۔

بجٹ میں گریڈ 1 سے 16 کے ملازمین کی تنخواہوں میں 25 فیصد اضافے، گریڈ 17 سے 21 تک کی تنخواہوں میں 22 فیصد اضافے، کے ایم سی کے ریٹائرڈ ملازمین کی پینشن میں 15 فیصد اضافے کی تجویز ہے۔

اس موقع پر میئر کراچی بیرسٹر مرتضیٰ وہاب کا کہنا ہے کہ کراچی سٹی کونسل کا بجٹ منظور کرالیا، اپوزیشن کا رویہ آپ سب نے دیکھا، یہ لوگ احتجاج کرتے رہیں اور ہم لوگ کام کرتے رہیں گے۔

میئرکراچی نے کہا کہ میرے لیے ہر یوسی چیئرمین قابل احترام ہے، اپنی یوسی کے لیے ایک بھی اسکیم پیش نہیں کی جب کہ بجٹ سے پہلے اپوزیشن کو اعتماد میں لیا۔

انہوں نے بتایا کہ بلدیہ عظمیٰ کراچی کے بجٹ میں کوئی نیا ٹیکس نہیں لگایا گیا لیکن اگر مگر سے معاملات نہیں چلتے۔