پیرو میں گزشتہ روز آنے والے زلزلے کے بعد آج دوبارہ طاقتور زلزلے نے ملک کو ہلا کر رکھ دیا

تفصیلات کے مطابق ایک روز قبل بھی ملک کے جنوبی علاقے میں آنے والے ایک طاقتور زلزلے کے نتیجے میں آٹھ افراد زخمی ہو گئے تھے، جبکہ سونامی کی وارننگ بھی جاری کی گئی تھی۔

جرمن ریسرچ سینٹر فار جیو سائنسز (جی ایف زیڈ) کے مطابق پیرو کے ساحل پر ہفتے کے روز 6 شدت کے زلزلے کے جھٹکے محسوس کیے گئے۔ زلزلے کا مرکز زمین سے 24 کلومیٹر گہرائی میں تھا۔

خیال رہے کہ ایک روز قبل جنوبی پیرو کے علاقے اریکوپا کے ساحل کے قریب 7 شدت کے زلزلے کے جھٹکے محسوس کیے گئے تھے، اس زلزلے میں کسی ہلاکت کی اطلاع نہیں ہے لیکن آٹھ افراد زخمی ہوئے ہیں۔

جمعے کے روز آنے والے زلزلے کے بعد اریکوپا میں 4 سے 4.6 شدت کے چار جھٹکے محسوس کیے گئے جس کی وجہ سے مقامی سڑکوں پر لینڈ سلائیڈنگ ہوئی۔

حکومت نے سوشل میڈیا پر کہا ہے کہ وہ نقصان کا اندازہ لگانے اور “اٹھائے جانے والے اقدامات کا تعین کرنے کے لئے نگرانی کر رہی ہے۔

امریکہ کے نیشنل سونامی وارننگ سینٹر نے کہا تھا کہ زلزلے سے سونامی کا خطرہ ہے اور پیرو کے ساحل کے کچھ حصوں میں لہروں کی سطح سے ایک سے تین میٹر کے درمیان بلند لہریں ریکارڈ کی گئی ہیں۔