اسلام آباد: وفاقی وزیر داخلہ محسن نقوی نے اسلام آباد کو عالمی معیار کا شہر بنانے کے لئے اہم فیصلے کیے ہیں۔

وزیر داخلہ محسن نقوی کی زیر صدارت سی ڈی اے میں اہم اجلاس ہوا جس میں جاری ترقیاتی منصوبوں پر پیش رفت کا تفصیلی جائزہ لیا گیا۔

اجلاس میں کری انکلیو، فیڈرل سیکریٹریٹ کی عمارت کی تزئین و آرائش، ڈپلومیٹک انکلیو اور اسمارٹ پارکنگ کے منصوبوں پر پیشرفت پر بھی غور کیا گیا جبکہ چیئرمین سی ڈی اے محمد علی رندھاوا نے وزیر داخلہ کو مختلف منصوبوں پر تفصیلی بریفنگ دی۔

دوران اجلاس وزیرداخلہ نے پیٹرول موٹر سائیکلز خریدنے پر پابندی عائد کردی اور کہا کہ ماحولیاتی آلودگی میں کمی کے لئے سی ڈی اے آئندہ سے صرف الیکٹرک بائیکس خریدے گی، اسلام آباد کے شہریوں کے لئے ماحول دوست الیکٹرک بسیں چلائی جائیں گی، اسلام آباد کے شہریوں کو انٹرنیشنل اسٹینڈرڈ کی ایمرجنسی سروسز فراہم کی جائیں گی۔

محسن نقوی نے ایمرجنسی سروسز کو ایم سی آئی سے سی ڈی اے کو منتقل کرنے کا فیصلہ کیا اور کہا کہ کیپٹل واسا کا قیام بھی جلد عمل میں لایا جائے گا، کیپیٹل ویسٹ مینجمنٹ کمپنی کے قیام کے لئے متعلقہ امور کو جلد حتمی شکل دی جائے گی۔

انہوں نے کہا کہ سرینہ چوک انڈر پاس اور ایف نائن پارک چوک  فلائی اوور منصوبوں پر تعمیراتی کام جلد شروع کر دیا جائے گا، طویل مدت سے زیر التوا ایکسپریس وے کے منصوبے کو مکمل کرنے کے لیے کام کی رفتار تیز کی جائے گی۔

وفاقی وزیر نے کہا کہ اسلام اباد کے کئی برس سے نان ڈویلپ سکیٹرز میں ترقیاتی کاموں کو مکمل کرکے لوگوں کو قبضہ دیا جائے گا، 17 برس سے تعطل کا شکار اسلام آباد ماڈل جیل پر کام تیزی سے جاری ہے، پہلے مرحلہ کو مقررہ مدت میں مکمل کیا جائے گا۔

انکا کہنا تھا کہ اسلام آباد میں بزنس فیسلیٹشن سینٹر بنائے جا رہے ہیں جہاں سرمایہ کاروں کو سہولیات ایک چھت تلے فراہم کی جائیں گی، سیکٹر ایچ سولہ میں ہیلتھ ٹاور کیلئے زمین کی الاٹمنٹ کر دی گئی ہے۔

وزیر داخلہ نے ریکارڈ ٹیکس وصولی پر چیئرمین سی ڈی اے سمیت پوری ٹیم کو مبارکباد دی اور کہا کہ صرف پلاٹ اور زمیں بیچ کر کوئی ادارہ نہیں چل سکتا، ضروری ہے کہ ادارے کے اثاثے بڑھائے جائیں۔

وفاقی وزیر محسن نقوی نے ہدایت دی کہ اس سلسلے میں انوسمنٹ پلان مرتب کر کے 7 روز میں پیش کیا جائے۔

واضح رہے کہ اجلاس میں چیئرمین سی ڈی اے محمد علی رندھاوا، ڈپٹی کمشنر اسلام آباد عرفان میمن اور سی ڈی اے کے تمام ممبران نے شرکت کی۔