پشاور: چیئرمین پیپلزپارٹی بلاول بھٹو کا کہنا ہے کہ خیبرپختونخوا حکومت 15 سالوں سے دہشت گردوں کی سہولت کار بنی ہوئی ہے۔

چیئرمین پیپلزپارٹی بلاول بھٹو زرداری نے پریس کانفرنس کرتے ہوئے کہا کہ پیپلزپارٹی نے ہمیشہ مثبت سیاست کی، ہم گالم گلوچ کی سیاست پریقین نہیں رکھتے، ہم چاہتے ہیں کہ مثبت طریقے سے سیاست کریں جب کہ پورے پاکستان میں مثبت سیاست کا فقدان ہے۔

بلاول بھٹو نے کہا کہ نفرت کی سیاست کرنے والوں کا مثبت سیاست سے مقابلہ کریں گے، معاشی مسائل تاریخی سطح پر پہنچ چکے ہیں جب کہ مہنگائی اورغربت ہر پاکستانی کا مسئلہ ہے اور دن بدن حالات بگڑ رہے ہیں۔

ان کا کہنا تھا کہ پیپلزپارٹی وفد کو اے پی سی میں بھیجیں گے اور اے پی سی میں مثبت رائے دیں گے، مسائل کا حل سنجیدگی سے نہ نکالا تو عوام کے غضب کا سامنا کرنا ہوگا جب کہ یہ حکومت پیپلزپارٹی کے ووٹ کی وجہ سے کھڑی ہے۔

چیئرمین پیپلزپارٹی کہتے ہیں کہ سیکیورٹی فورسز نے دہشت گردی کو تاریخی شکست دی اور غلط فیصلوں کے باعث دہشت گردی پھر سر اٹھا رہی ہے جب کہ دہشت گردی کے خلاف تمام فیصلے مل کر کرنا ہوں گے۔

انہوں نے کہا کہ غیرجموری سیاست کا ڈٹ کرمقابلہ کریں گے، خیبرپختونخوا میں نفرت اور انا کی سیاست کی جارہی ہے جب کہ اگلا بجٹ بننے سے پہلے ہم ساتھ بیٹھیں گے اور کوشش ہے حالات کو بہتری کی طرف لے کر جائیں۔

بلاول بھٹو نے بتایا کہ پی ایس ڈی پی پر بجٹ سے پہلے بات کرنے کی یقین دہانی کرائی گئی ہے، افغانستان میں دنیا کوشکست ہوئی اور افغانستان میں اتنی ساری فوج بھی اپنا ہدف حاصل نہیں کرسکی۔

انہوں نے مزید کہا کہ عوام اور فورسز کی وجہ سے دہشت گرد تنظیموں کوشکست دی گئی تھی جب کہ پچھلی حکومت کے فیصلوں سے دہشت گرد تنظیمیں سر اٹھا رہی ہیں، پیپلزپارٹی کے مطالبے پر ہی جنرل (ر) باجوہ اورفیض حمید نے بریفنگ دی تھی۔

ان کا مزید کہنا تھا کہ خیبرپختونخوا حکومت 15 سال سے دہشت گردوں کی سہولت کار بنی ہوئی ہے، خیبرپختونخوا حکومت کے بجٹ سے دہشت گرد تنظیموں کو فنڈنگ ہورہی ہے۔