مشیراطلاعات خیبرپختونخوا بیرسٹرڈاکٹر سیف نے کہا کہ سرحد پاردہشتگردی کو روکنا صوبائی حکومت کی نہیں بلکہ وفاق کی ذمہ داری ہے۔

بیرسٹر ڈاکٹرسیف نے کہا کہ جعلی وفاقی حکومت دہشتگردی کے خلاف جاری جنگ میں سنجیدہ نہیں، جبکہ وزیراعظم ملک میں موجودہ سیکیورٹی معاملات پرغیر ذمہ دارانہ بیانات دے رہے ہیں۔

مشیراطلاعات خیبرپختونخوا نے کہا کہ وفاقی حکومت کی حرکتوں کی وجہ سے دہشتگردی کے خلاف جاری جنگ میں قوم میں عدم اعتماد کا فقدان بڑھ گیا ہے جبکہ دوسری جانب دہشتگردی کے خلاف جاری جنگ میں قوم اورسیکیورٹی فورسز قربانیاں دے رہی ہیں۔

بیرسٹرڈاکٹرسیف نے یہ بھی کہا کہ وفاقی حکومت غیرسنجیدہ بیان بازی سے ملک کے مقبول ترین سیاسی جماعت پر دہشتگردی کے فروغ کا الزام لگارہی ہے، جبکہ غیر سنجیدہ بیان بازی سے جعلی سرکار نے ملک کو ناقابل تلافی نقصان پہنچایا ہے۔

مشیراطلاعات خیبرپختونخوا نے کہا کہ جعلی فارم 47 سرکار دہشتگردی جسے اہم قومی مسئلے پر سیاست کررہی ہے جبکہ وزیراعظم کی جانب سے عزم استحکام کے حوالے سے غیرسنجیدہ بیان نے کنفیوژن پیدا کردی تھی، اس کے علاوہ عزم استحکام کے حوالے سے وزیراعظم کی غیر ذمہ دارانہ بیان کی وجہ سے عوام نے سیکیورٹی اداروں پر تنقید کی۔

 بیرسٹرڈاکٹرسیف  نے کہا کہ وزیراعظم کی غیر ذمہ دارانہ بیان نے فوج اور دہشتگردی کے خلاف جاری جنگ میں قوم اور اداروں کے عزم اور ارادوں کو نقصان پہنچایا ہے، جبکہ مسلم لیگ ن عوام اور فوج کے درمیان اختلاف اور خلیج پیدا کرنے کی کوشش کررہی ہے۔

مشیراطلاعات خیبرپختونخوا نے یہ بھی کہا کہ وفاقی کابینہ اجلاس کے بعد جعلی سرکار نے ایک بار پھر خیبرپختونخوا کے خلاف جھوٹ پرمبنی سیاسی بیان بازی کا نیا سلسلہ شروع کیا ہے، اس کے علاوہ وفاقی کابینہ نے الزام لگایا کہ فوج نے جن علاقوں کو کلئیر کیا خیبرپختونخوا حکومت نے وہاں دوبارہ شدت پسندوں کو آباد کیا۔

بیرسٹر ڈاکٹرسیف نے کہا کہ وفاقی حکومت ہمیں ثبوت دیں کہ خیبرپختونخوا حکومت نے کہاں پرشدت پسندوں کو آباد کیا ہے، وزیر اعظم نے اسمبلی فلور میں غلط بیان دیا کہ خیبرپختونخوا میں سی ٹی ڈی نہیں اور وفاقی حکومت کے 590 ارب کھا گئے، خیبرپختونخوا میں 2014 سے سی ٹی ڈی آپریشنل ہے۔

 مشیراطلاعات بیرسٹرڈاکٹر  سیف نے کہا کہ وفاق نے 590 ارب سوات آپریشن کے بعد اخراجات اور نقصانات کے لیے دئیے، جبکہ جیو فیکٹ چیک نے بھی ثابت کر دیا کہ وزیراعظم نے اسمبلی فلور پر خیبر پختونخوا میں سی ٹی ڈی اور اعداد شمار پرغلط بیان دیا ہے۔