وزیراعظم محمد شہبازشریف نے کہا کہ گندم اور دیگر فصلوں کی پیداوار میں اضافے کے لئے مؤثر اقدامات کئے جائیں۔

وزیراعظم محمد شہبازشریف کی زیر صدارت آج وزارت قومی غذائی تحفظ و تحقیق اور پاسکو سے متعلق اجلاس ہوا، جس میں وییٹ (Wheat) بورڈ کی ری اسٹرکچرنگ کی منظوری دی گئی۔

وزیراعظم نے ہدایت دی کہ وییٹ بورڈ میں کسانوں کے نمائندوں اور لینڈ انفارمیشن اینڈ مینجمنٹ سسٹم اورسپارکو کے نمائندگان کو شامل کیا جائے۔

وزیراعظم نے اجلاس میں پاسکو کی نجکاری کے حوالے سے لائحہ عمل تیار کرنے کی بھی ہدایت دی۔

وزیراعظم کی وفاقی حکومت کی گندم کی خریداری کے حوالے سے متبادل حکمت عملی ترتیب دینے اور اس حوالے سے صوبوں ، گلگت بلتستان ، آزاد جموں و کشمیر کی حکومتوں اور دیگر متعلقہ اداروں سے مشاورت کی بھی ہدایت دی۔

اجلاس کو وییٹ بورڈ کی ری اسٹرکچرنگ اور ٹی او آرز کے علاوہ گندم اور دیگر فصلوں کی پیداوار بڑھانے اور پاسکو میں اصلاحات کے حوالے سے بریفنگ دی گئی۔

اجلاس میں وفاقی وزیر اقتصادی اموراحد خان چیمہ، وفاقی وزیر خزانہ و محصولات محمد اورنگزیب، وفاقی وزیر قومی غذائی تحفظ و تحقیق رانا تنویر حسین، وفاقی وزیراطلاعات و نشریات عطاء اللہ تارڑ، وزیر مملکت برائے خزانہ و محصولات علی پرویز ملک، ڈپٹی چیئرمین پلاننگ کمیشن جہانزیب خان، وزیراعظم کے کوآرڈینیٹر رانا احسان افضل اور متعلقہ اعلیٰ سرکاری افسران نے شرکت کی۔