لاہور: کل جماعتی حریت کانفرنس کا وفد آئی پی پی سیکرٹریٹ پہنچ گیا۔

کل جماعتی حریت کانفرنس کا وفد پرویز شاہ کی قیادت میں آئی پی پی سیکرٹریٹ پہنچا، جہاں آئی پی پی پنجاب کے صدر، جنرل سیکرٹری و مرکزی ایڈیشنل جنرل سیکرٹری نے ان کا استقبال کیا۔

وفد سے رانا نزیر احمد خان، ایم پی اے شعیب صدیقی اور میاں خالد محمود نے ملاقات کی جب کہ ملاقات میں ملکی سیاسی صورت حال سمیت جدو جہد آزادی کشمیر پرتفصیلی تبادلہ خیال کیا گیا ۔

وفد کی جانب سے آئی پی پی کو آزادی کشمیر کے لئے 19جولائی کو ریلی میں شرکت کی دعوت دی، وفد میں سیکرٹری جنرل اے پی ایچ سی پرویز شاہ ایڈوکیٹ اور سینئر رہنما زاہد شفیع شامل تھے۔

سینئر ممبران انجینئر محمود، شیخ یعقوب، زاہد اشرف اور محمد شفیع ڈار بھی ملاقات میں موجود تھے۔

صدر آئی پی پی پنجاب رانا نذیر احمد نے کہا کہ مسئلہ کشمیر کو اقوام متحدہ کی قرادادوں سے حل ہونا چاہئے۔

ایم پی اے شعیب صدیقی کا کہنا تھا کہ استحکام پاکستان پارٹی کشمیری بھائیوں کے شانہ بشانہ کھڑی ہے جب کہ میاں خالد محمود نے کہا کہ آزادی کشمیر کے لئے آئی پی پی کی قیادت ہر فورم پر آواز اٹھارہی ہے۔

وفد نے گفتگو میں کہا کہ سیاسی جماعتوں کی ریلی میں شرکت مسئلہ کشمیر کو عالمی سطح پر اجاگر کرے گی جب کہ اس موقع پر آئی پی پی لاہور سٹی کے صدر ملک زمان نصیب اور جنرل سیکرٹری رانا جاوید بھی موجود تھے۔