راولپنڈی: سربراہ عوامی مسلم لیگ شیخ رشید احمد نے ایک بار پھر اسٹیبلشمنٹ سے عام معافی کی اپیل کر دی۔

سابق وفاقی وزیر شیخ رشید نے اڈیالہ جیل کے باہر میڈیا سے گفتگو کرتے ہوئے کہا کہ حالات خراب، معیشت تشویشناک ہیں،میں نے بطور وزیر 5 سال معافی دی، اسٹیبلشمنٹ سے عام معافی کی اپیل کرتا ہوں،۔

انہوں نے کہا کہ آپ نے صنم جاوید کو وکیل کے چیمبر سے اٹھایا ہے، پولیس نے اپنے ساتھ کچھ اور لوگوں کے وقار کا ستایاناس کیا، بہتر ہے ہمیں 2,2 سال سزا بنتی ہے وہ دیتے تو کاٹ لیتے۔

شیخ رشید نے کہا کہ بجلی کے نرخ بڑھانے جا رہے ہیں، آپ اس ملک میں چھینا جھپٹی چاہتے ہیں، آپ حالات اتنے خراب کر دیں گے کہ سنبھالے نہیں جائیں گے، یہ سیاستدانوں کا کام نہیں ہے، غریب زندہ مر گیا ہے۔

انکا کہنا تھا کہ ملک کینیا کی طرف جا رہا ہے کے پی اور بلوچستاں میں کیا حالات ہیں، ملک میں لوگ اس حکومت پر لعنت بھیجتے ہیں، خدا کے لئے اپنی عزت اور ملک بچائیں، ہمیں کرینوں پر لٹکا دیں، سزا دیں لیکن ملک بچالیں۔

سابق وفاقی وزیر نے کہا کہ ملک کی معیشت ان سے نہیں سنبھل رہی، نواز شریف نیا بیانیہ لائے گا اور عوام ذلیل ہونے کے لئے رہ جائے گی۔

عوامی مسلم لیگ سربراہ نے کہا کہ بانی پی ٹی آئی کو کیسے چھوڑیں گے، روز کہتے ہیں وہ آرہا ہے، وہ نہیں آرہا، قبر ایک اور مردے 3 ہیں، شہباز کا بھی اب فیصلہ ہو گا، ایک مشرق دوسرا مغرب کو بھاگے گا۔

شیخ رشید نے مزید کہا کہ عدلیہ کو سلام ہے، مخصوص نشستوں پر تاریخی فیصلہ کیا ہے اور ملک کو بچانے میں تاریخی کردار ادا کرے گی۔