کالعدم ٹی ٹی پی کے سربراہ خارجی نور ولی محسود کی ہوشربا خفیہ کال منظرِ عام پر آگئی ہے۔

دشمن کے آلہ کارٹی ٹی پی کے انتہا پسند خوارج نے نام نہاد شریعت کا لبادہ اوڑھ کر پاکستان کے امن کو تباہ کرنے میں کوئی کسر نہیں چھوڑی ہے، بدامنی پھیلانے کے اس مکروہ دھندے میں خوارج عملی طور پر اور پراپیگنڈے کے ذریعے پاکستانی عوام کو نشانہ بنا رہے ہیں۔

حالیہ ڈی آئی خان کے علاقے کری شموزئی میں خوارج کی جانب سے دیہی ہیلتھ سینٹر پرحملہ کر کے معصوم مرد وخواتین اور بچوں کو شہید کرنا بھی اسی سلسلے کی کڑی ہے۔

اس حوالے سے ٹی ٹی پی کے خوارج نور ولی محسود، احمد حسین عرف غٹ حاجی اور لوکل ٹی ٹی پی کمانڈر ثاقب گنڈہ پور کی کال منظر عام پر آگئی ہے۔

ٹیلیفون کال میں واضح طور پر خوارج کی مکروہ حکمت عملی کو سمجھا جاسکتا ہے، خفیہ کال میں ٹی ٹی پی کا سربراہ نور ولی محسود پاکستان میں دہشت گردانہ کارروائیوں کے لئے اپنے خارجی دہشت گرد کو ہدایات دے رہا ہے۔

خارجی نور ولی محسود دہشت گرد کو ہدایات دے رہا ہے کہ کس طرح پاکستان میں امن و امان کی صورت حال کو خراب کرنا ہے اور ٹی ٹی پی کا نام بھی ظاہر نہیں ہونے دینا۔

خارجی نور ولی محسود نے کہا کہ ’’امن و امان کی صورت حال بگاڑنے کے دو طریقے ہیں، پہلا طریقہ یہ ہے کہ سرکاری اسکول یا اسپتال کو دھماکے سے اڑا یا جائے اور ذمہ داری قبول کرتے ہوئے کہا جائے کہ اگر سیکیورٹی فورسز ہمارے گھر مسمار کر رہی ہیں تو ہم بھی اسکول، اسپتال اور سرکاری املاک کو مسمار کریں گے‘‘۔

خارجی نور ولی محسود کا کہنا تھا کہ پھر ایک دو اسکول یا اسپتالوں کو دھماکے سے اڑا دو لیکن ذمہ داری نہ قبول کی جائے جب کہ دوسرا طریقہ یہ ہے کہ پولیس اور فوجیوں کے گھروں کو مسمار کیا جائے۔

خارجی نور ولی محسود نے ہدایت دی کہ ان دونوں طریقوں میں سے جو اچھا لگے اس پر عمل کرلو تاکہ زیادہ فائدہ ہو جب کہ آڈیو کلپ میں نور ولی محسود یہ بھی پیغام دے رہا ہے کہ ’’کسی کو اس بات کا علم نہ ہو کہ یہ سب کچھ نور ولی محسود نے کہا ہے اور اگر کسی نے پوچھا تو اپنے ذمہ لے لینا‘‘۔

نور ولی محسود نے کہا کہ کسی بھی طرح ٹی ٹی پی کے سربراہ یعنی نور ولی محسود کو اس کارروائی کا حصہ نہ بنایا جائے کیونکہ اس سے مقامی لوگوں میں ٹی ٹی پی کے لئے نفرت پیدا ہوگی۔

نور ولی محسود واضح طور پر بتارہا ہے کہ ’’جو دو طریقے میں بتا رہوں، اس میں کسی ایک پر عمل کر لو تاکہ نقصان زیادہ ہو‘‘۔

خفیہ کال میں احمد حسین عرف غٹ حاجی لوکل خارجی ثاقب گنڈاپور کو ہدایت دے رہا ہے کہ پولیس، فوج اور ایف سی کے ایسے گھروں کو دھماکے سے اڑانا ہے جو بڑے عہدے پر ہوں۔

احمد حسین عرف غٹ حاجی کہتا ہے کہ غیر اعلانیہ طور پر اسکولوں کو یا تو بند کردو یا پھر دھماکے سے اڑا دو لیکن یہ بات چیت صرف ہمارے درمیان رہے گی، کسی کو اس کا علم نہیں ہونا چاہیے۔

اسکولوں اور عوامی بہبود کے سینٹرز پر حملے کرنا اور معصوم عوام کو نشانہ بنانا ٹی ٹی پی کے خوارج کی نام نہاد شریعت ہے۔

بنیادی طور پر خیبر پختونخوا میں بدامنی پھیلانے کے اس منصوبے میں دشمن ایجنسیوں کے آلہ کار دہشت گرد، سیاسی اور غیر سیاسی عناصر شامل ہیں جب کہ اس طرح کے واقعات اور بنوں میں بدامنی پھیلانے کے پیچھے بھی یہی عناصرِ ملوث ہیں۔

حکومت پاکستان کو فوری طور پر اس ٹیلیفونک کال کا فرانزک ٹیسٹ کروا کر ذمہ داران کو قانونی شکنجے میں لانا چاہیے۔