وفاقی وزیراطلاعات عطاتارڑ نے کہا ہے کہ ملک میں انتشارپیدا کرنا پی ٹی آئی کا منشور ہے، پی ٹی آئی سیاسی نہیں دہشت گرد جماعت ہے۔

اسلام آباد میں نیوز کانفرنس کرتے ہوئے وفاقی وزیر اطلاعات عطا تارڑ نے کہا کہ پی ٹی آئی نے ہمیشہ انتشار، تشدد کی سیاست کی، پی ٹی آئی والے ہمیشہ لاشوں کی تلاش میں رہتےہیں، پی ٹی آئی جب حکومت میں تھی تب بھی یہی پالیسی تھی۔

عطاتارڑنے کہا کہ 9 مئی کوپی ٹی آئی کا بیانیہ تھاعوام کوفوج سے لڑوا دو، پی ٹی آئی ملک میں معیشت کوتباہ کرناچاہتی ہے، بنوں میں پرامن مارچ میں سیاسی جماعتوں کے نمائندے شامل ہوئے، ان کے لوگ مسلح جتھوں کی شکل میں شامل ہوئے۔

وزیراطلاعات نے کہا کہ تحریک انتشار کے مسلح لوگوں نے فائرنگ کی، یہ لوگ شہدا کی قربانیوں کا بھی پاس نہیں رکھتے، لاشوں کی تلاش 2014 سے جاری ہے، ان کی کوشش رہی اپنے لوگوں کو مروا کرالزام حکومت پرلگایا جائے، آپ دہشت گردوں کولاکرملک میں بساتے ہیں۔

عطاتارڑنے نیوزکانفرنس میں کہا کہ فائرنگ کا واقعہ دیوارسے ایک کلومیٹردورہوا، پی ٹی آئی نے نوجوانوں کو بد اخلاقی پر اکسایا، کیا امن مارچ میں لوگ مسلح ہو کرآتے ہیں، بانی پی ٹی آئی کوپسند کا کھانا دیا جاتا ہے، انہوں نے اپنے مخالفین کو کیسے کیسے جیلوں میں رکھا۔

وفاقی وزیراطلاعات نے کہا کہ بانی پی ٹی آئی بنوں واقعے سے سیاسی فائدہ اٹھانا چاہتے ہیں، فرینکفرٹ میں پاکستانی قونصل خانے پر حملہ کیا گیا، دفترخارجہ نے جرمنی سے اپنا احتجاج ریکارڈ کرایا ہے، دفترخارجہ نے کہا واقعے میں ملوث عناصر کو گرفتار کیا جائے۔

عطا تارڑ نے کہا کہ ایک ملک کے باشندوں نے پاکستانی پرچم کی بے حرمتی کی، ایک جماعت جودہشت گرد ہے اس کومنطقی انجام تک پہنچائیں گے، پی ٹی آئی کو بن مانگے ریلیف مل گیا، مظلومیت کا پرچارکرنے سے ریلیف نہیں ملے گا، انٹرنیٹ سروس فراہمی میں تعطل ہوا، حکومت کا اس میں تعلق نہیں۔

انھوں نے مزید کہا کہ پاکستانی پرچم کی سربلندی کے لیے توجان بھی حاضر ہے، جرمن حکومت نے ملوث عناصر کے خلاف کارروائی کی یقین دہانی کرائی، کوئی پاکستانی ملوث ہوا توآئی ڈی کارڈ، پاسپورٹ بلاک کیا جائے گا۔