وزیر اعلیٰ مریم نواز نے چکن کے نرخ بڑھنے پر خصوصی اجلاس طلب کیا جس میں  صوبے بھر میں چکن اور پولٹری مصنوعات کے نرخ  میں مسلسل اضافے پر شدید برہمی کا اظہار کیا۔

وزیر اعلیٰ پنجاب مریم نوازشریف کا چکن  کی مصنوعی مہنگا ئی پر اظہار تشویش کرتے ہوئے چکن کی پرائس کا تعین کرنے کے لئے ریگولیٹری میکنزم تشکیل دینے کا حکم دیا۔

وزیر اعلیٰ پنجاب نے اجلاس میں کہا کہ چکن صوبہ بھر میں عوام  کے زیادہ استعمال کی چیز ہے ، ریٹ بڑھنا گوارا نہیں، پولٹری والے بزنس کریں جائز منافع کمائیں لیکن عوام پر ناجائز بوجھ نہ ڈالیں۔

 مریم نواز نے کہا کہ اپنے عوام کا احساس ہے، مافیاز کو مہنگائی کی اجاز ت نہیں دے سکتے، کسی کا نقصان نہیں چاہتے مگر کیا عوام کو مافیاز کے رحم و کرم پر چھوڑ دیں، مہنگائی کسی صورت قابل قبول نہیں، تمام متعلقہ ادارے فیلڈ میں  مانیٹرنگ کریں۔

وزیر اعلیٰ پنجاب نے کہا کہ چکن کی قیمتیں عام آدمی کی پہنچ سے باہر نہیں ہونی چاہیے، نرخ پر نظر رکھی جائے۔

اجلاس میں سینئر منسٹر مریم اورنگ زیب ، وزیر اطلاعات و ثقافت عظمیٰ زاہد بخاری، صوبائی وز را بلال یاسین، عاشق حسین۔ایم پی اے سلمی بٹ، پرنسپل سیکرٹری ساجد ظفر ڈال، سیکرٹریز ، ڈی جی انڈسٹریز اور دیگر حکام نے شرکت کی۔