وفاقی وزیر برائے منصوبہ بندی احسن اقبال نے کہا ہے کہ اس وقت ملک معاشی چیلنجز کا سامنا کر رہا ہے۔

احسن اقبال کی زیرِ صدارت وزارت منصوبہ بندی میں کام کرنے والے مختلف شعبوں کے ماہرین کا اجلاس ہوا جس میں سیکرٹری منصوبہ بندی، ممبران اور سینئر افسران نے شرکت کی۔

سیکٹر سپشلسٹس کی ایک سالہ کارکردگی اور فائیو ایز فریم ورک پر عملدرآمد کے حوالے سے تفصیلی جائزہ لیا گیا۔

اس موقع پر وفاقی وزیر احسن اقبال نے کہا کہ ہمیں فائیو ایز پر عمل درآمد اور مانیٹرنگ کا ایک میکنزم تشکیل دیا جائے، ایکسپورٹ کو 60 بلین تک لے جانے کا ہدف مقرر کیا گیا ہے۔

انہوں نے کہا کہ ایکسپورٹ کو 60 ارب ڈالر تک لے جانے کے لیے ہر سطح پر بہت زیادہ محنت کرنے کی ضرورت ہے، آگے بڑھنے کے لیے ہمیں اپنے محصولات اور برآمدات کو بڑھانا ہوگا۔

ان کا کہنا تھا کہ فائیو ایز معیشت کے تمام شعبوں میں بہتری لانے کے لئے بنیادی ڈھانچے کی حیثیت رکھتا ہے، 5 ایز فریم ورک میں برآمدات،توانائی،  ایکویٹی، ای پاکستان اور ماحولیات کے شعبے شامل ہیں۔

احسن اقبال نے کہا کہ اس وقت ملک معاشی چیلنجز کا سامنا کر رہا ہے، ملکی ترقی کے لیے سائنس اور انفارمیشن ٹیکنالوجی کے شعبوں میں واضح اہداف کا تعین اور ان کا حصول ضروری ہے۔

وفاقی وزیر کا کہنا تھا کہ گورننس میں بہتری اور معیشت کو جدید خطوط پر استوار کرنے کے لئے ہم نے ڈیجیٹلائزیشن کو اپنی اولین ترجیحات میں شامل کیا ہے۔