وزیراعظم شہباز شریف سے اقتصادی تعاون تنظیم کے سبکدوش ہونے ہوالے سیکرٹری جنرل خسرو نوزیرنے ملاقات کی۔ 

ملاقات کے دوران سبکدوش ہونے والے سیکریٹری جنرل نے وزیراعظم کو ای سی او کے اقدامات اوربحالی کے اپنے اصلاحاتی ایجنڈے سے آگاہ کیا، جبکہ وزیراعظم نے ای سی او کو علاقائی تعاون کے پلیٹ فارم کے طور پرفروغ دینے کے لیے سیکرٹری جنرل کی کوششوں کو سراہا۔

وزیراعظم نے کہا کہ نوزیری پاکستان کی فارن سروس اکیڈمی سے فارغ التحصیل تھے جو کہ پاکستان لیے اعزاز کی بات ہے، وزیراعظم نے تاجکستان کے صدر امام علی رحمٰن کے لیے بھی نیک خواہشات کا اظہار کیا۔

شہباز شریف نے ملاقات کے دوران کہا کہ پاکستان ای سی او ممالک کے درمیان علاقائی تجارت کو بڑھانے کے ساتھ ساتھ ای سی او اصلاحات کے ایجنڈے کے لیے مکمل حمایت جاری رکھے گا، ای سی او ویژن 2025 کے اہم دستاویز پرسابق وزیراعظم نوازشریف کی سرپرستی میں اسلام آباد میں 2017 میں دستخط کیے گئے تھے جو کہ ای سے او کے لیے ایک انتہائی اہم سنگ میل ہے۔

وزیراعظم نے کہا کہ پاکستان کو اس بات پر فخر ہے کہ ای سی او کے آئندہ سیکرٹری جنرل اسد مجید خان، پاکستان کے سابق سیکرٹری خارجہ رہے، دوسری جانب خسرو نوزیری نے ای سی او کے سیکرٹری جنرل کی حیثیت سے خدمات سر انجام دیتے ہوئے پاکستان کی جانب سے مسلسل حمایت پر وزیراعظم کا شکریہ ادا کیا۔