نام نہاد بلوچ راجی موچی کے پیروکاروں کا احتجاج کی آڑ میں پُرتشدد ہجوم نے سیکیورٹی فرائض پر مامور اہلکاروں پر حملہ کر دیا جس کے نتیجے میں ایک اہلکار شہید ہو گیا۔

پاک فوج کے شعبہ تعلقات عامہ (آئی ایس پی آر) کے مطابق نام نہاد بلوچ راجی موچی کے پیروکاروں کا احتجاج کی آڑ میں پرتشدد ہجوم نے ضلع گوادر میں سیکیورٹی فرائض پر مامور سیکیورٹی فورسز کے اہلکاروں پر حملہ کیا۔ جس کے نتیجے میں ضلع سبی سے تعلق رکھنے والے 30 سالہ سپاہی شبیر بلوچ شہید ہو گیا۔

اس حملے کے علاوہ پرتشدد مظاہرین کی جانب سے بلا اشتعال حملوں کے نتیجے میں ایک افسر سمیت سولہ فوجی بھی زخمی ہوئے ہیں۔

آئی ایس پی آڑ کا کہنا تھا کہ دوسری جانب سوشل میڈیا پر جعلی اور بدنیتی پر مبنی پراپیگنڈہ کیا جا رہا ہے جس میں پراپیگنڈا کرنے والوں کی جانب سے مسخ شدہ تصاویر اور ویڈیوز کا استعمال کرتے ہوئے غیر قانونی پرتشدد مارچ کے لیے ہمدردی اور حمایت حاصل کی جا رہی ہے۔

سیکیورٹی فورسز نے اشتعال انگیزی کے باوجود غیر ضروری شہری ہلاکتوں سے بچنے کے لئے انتہائی تحمل کا مظاہرہ کیا ہے۔

پاک فوج کے ترجمان کا کہنا تھا کہ ہجوم کی پرتشدد کارروائیاں ناقابل قبول ہیں اور ذمہ داروں کو انصاف کے کٹہرے میں لایا جائے گا۔

آئی ایس پی آر نے کہا کہ تمام شہریوں پر زور دیا جاتا ہے کہ وہ پروپیگنڈے کا شکار نہ ہوں، پرسکون اور پرامن رہیں اور امن و امان برقرار رکھنے میں قانون نافذ کرنے والے اداروں کے ساتھ تعاون کریں۔

آئی ایس پی آر کا مزید کہنا تھا کہ پاکستان کی سیکورٹی فورسز قوم کے شانہ بشانہ بلوچستان کے امن و استحکام کو سبوتاژ کرنے کی کوششوں کو ناکام بنانے کے لئے پرعزم ہیں۔