عطا تارڑ نے کہا ہے کہ بانی پی ٹی آئی دوبارہ یو ٹرن لے رہےہیں، ’مجھ سے پلیز بات کرو‘ کے نام سے ایک نئی فلم آئی ہے۔

اسلام آباد میں میڈیا سے گفتگو کرتے ہوئے وفاقی وزیراطلاعات عطا تارڑ نے کہا ہے کہ پولی گرافک ٹیسٹ سے اس لیے بھاگ رہے ہیں کہ سچ ثابت ہو جائےگا، پی ٹی آئی ملک دشمن ایجنڈے پرکاربند ہے،آپ نے اس ملک کی معیشت کے لیے کیا کیا؟

عطاتارڑنے کہا کہ پی ٹی آئی دورمیں ملکی معیشت کو بہت نقصان پہنچایا گیا، موجودہ حکومت نےملک کو دیوالیہ ہونے سے بچایا، اب آپ کہہ رہے ہو مجھ سے بات کرلو، آپ کا بھانجا اورتینوں بہنیں کورکمانڈرہاؤس کے باہر موجود تھیں۔

وفاقی وزیر اطلاعات نے کہا کہ آپ کہہ رہے ہیں بات چیت کے لیے نمائندہ مقررکیاجائے، اگر کوئی بگڑا بچہ ہے تو وہ بانی پی ٹی آئی ہے، نیوٹرل کی بات ہوئی توبانی پی ٹی آئی نے کہا نیوٹرل جانورہوتا ہے، جب آپ کا دل کرتا ہے آئی ایم ایف کو خط لکھتے ہیں۔

انھوں نے میڈیا سے گفتگو میں کہا کہ آپ نے دیگرممالک سے پاکستان کے تعلقات خراب کرنےکی کوشش کی، ان لوگوں نےکےپی میں قیام امن کےلیے کیااقدامات کیے؟ بانی پی ٹی آئی نے سوشل میڈیا پراداروں کے خلاف منظم مہم چلائی، آپ کی پارٹی کے لوگ کہتےہیں بانی پی ٹی آئی نہیں توپاکستان نہیں۔

عطاتارڑنے کہا کہ آپ کبھی گریبان پکڑ لیتے ہیں تو کبھی پاؤں پڑ جاتے ہیں، ملکی سلامتی پر کوئی سمجھوتہ نہیں ہوسکتا، ’مجھ سے پلیزبات کرو‘کے نام سے ایک نئی فلم آئی ہے، بانی پی ٹی آئی دوبارہ یو ٹرن لے رہےہیں، بانی پی ٹی آئی آج مذاکرات کے لیے منتیں کررہے ہیں، آپ 9 مئی کے حملے کرتےہیں، شہداکی یادگار وں کی بے حرمتی کرتےہیں۔

وزیراطلاعات نے مزید کہا کہ آپ قومی سلامتی کے اداروں اورملکی سلامتی کے لیے خطرے پیداکرتے ہیں، آپ جھوٹابیانیہ گھڑتے اورعوام کو گمراہ کرنے کی کوشش کرتے ہیں، بانی پی ٹی آئی نے ملکی مفادات کے خلاف سیاست کی، آپ کےجرائم کی فہرست بہت طویل ہےجوختم ہونے کا نام ہی نہیں لےرہی۔