کراچی سمیت اسلام آباد، لاہور، پشاور، مظفرآباد اور دیگر شہروں میں بھارت کی طرف سے مقبوضہ کشمیر کی خصوصی حیثیت ختم کرنے کے 5 سال مکمل ہونے پر کشمیریوں سے اظہار یکجہتی کیلئے ملک بھر میں آج یوم استحصالِ کشمیر منایا جارہا ہے۔

ہندوتوا سے متاثر بی جے پی کی زیر قیادت ہندوستانی حکومت نے 5 سال قبل کشمیر کی خصوصی حیثیت کو منسوخ کرتے ہوئے ہندوستانی آئین کے آرٹیکل 370 اور 35-A کو غیر قانونی اور یکطرفہ طور پر منسوخ کر دیا تھا۔

ملک کے دیگر شہروں میں آج صبح 9 بجے ایک منٹ کی خاموشی اختیار کی گئی اور تمام چلنے والے ٹریفک ٹھپ ہو گئے جبکہ پاکستان اور آزاد کشمیر کے قومی ترانے بھی بجائے گئے۔

پورے ملک میں کشمیر بنے گا پاکستان، انڈیا جاجا کشمیر سے نکل جا کے بھارت مخالف نعروں کی آوازیں گونج رہی ہے۔

دوسری جانب حریت کانفرنس نے یوم استحصال کشمیر پر وادی بھر میں مکمل ہڑتال کا اعلان کر رکھا ہے، لائن آف کنٹرول کے دونوں اطراف بھارت مخالف احتجاجی مظاہرے جاری ہیں۔

مسلح افواج کا مقبوضہ جموں و کشمیر کے دلیر عوام کے ساتھ اظہارِ یکجہتی

یوم استحصال کے موقع پر مسلح افواج کی قیادت نے مقبوضہ جموں و کشمیر کے دلیر اور غیور عوام کے ساتھ اظہار یکجہتی کیا ہے۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق چیئرمین جوائنٹ چیفس آف اسٹاف کمیٹی، سروسز چیفس اور مسلح افواج نے خصوصی پیغام کیا ہے۔

آئی ایس پی آر کا کہنا ہے کہ کشمیریوں کی حصول حق خود ارادیت کی جائز اور طویل جدوجہد کی حمایت مکمل کرتے ہیں، بھارتی فورسز کی بین الاقوامی قوانین کی اور انسانی حقوق کی مسلسل خلاف ورزیاں انتہائی قابل مذمت ہیں۔

آئی ایس پی آر نے کہا کہ مقبوضہ کشمیر میں جاری سخت فوجی لاک ڈاؤن، علاقے کے آبادیاتی حیثیت تبدیل کرنے کی غیر قانونی کوششوں اور ہندوستانی حکومت کے جارحانہ بیانات قابلِ مذمت ہیں، بھارت کا ریاستی جبر اور انسانی بحرانوں کو ہوا دینا علاقائی استحکام کے لئے مستقل خطرہ ہیں۔

جاری کردہ بیان میں مزید کہا گیا کہ مسلح افواج کشمیریوں کی جبر و استبداد کے خلاف جدوجہد کی سیاسی، اخلاقی اور انسانی بنیادوں پر حمایت جاری رکھے گی۔