بیرسٹر سیف کا کہنا ہے کہ بانی پی ٹی آئی کا حکم ہے کہ کرپشن کیلئے زیروٹالرنس ہوگی، اسی تناظرمیں کمیٹی بھی بنائی گئی۔

پشاورمیں ویڈیو کے ذریعے پی ٹی آئی کے رہنما بیرسٹر سیف نے اپنے بیان میں بتایا کہ بانی پی ٹی آئی سے آج اڈیالہ جیل میں ملاقات ہوئی، صوبائی وزیرکی ڈی نوٹیفکیشن اورکابینہ سے برطرفی پربات ہوئی۔

بیرسٹرسیف نے کہا کہ بانی پی ٹی آئی کا پیغام کارکنوں، عہدیداروں اورکابینہ ارکان تک پہنچاوں گا، کرپشن کے حوالے سے تحقیقات کرنے والی کمیٹی بانی پی ٹی آئی کی مرضی سے بنی تھی، کمیٹی ممبران کے تمام نام بھی بانی پی ٹی آئی نے خود دیے۔

انھوں نے کہا کہ شاہ فرمان، قاضی محمد انور، مصدق عباسی کمیٹی کے ممبرتھے، کمیٹی نے تمام بیانات اورشواہد کی روشنی میں رپورٹ مرتب کی، رپورٹ وزیراعلیٰ کوپیش کرنے کے بعد ڈی نوٹیفکیشن کی کارروائی عمل میں لائی گئی۔

بیرسٹرسیف نے کہا کہ بانی پی ٹی آئی کا حکم ہے کہ کرپشن کیلئے زیروٹالرنس ہوگی، اسی تناظرمیں کمیٹی بھی بنائی گئی، ایک محکمے میں کرپشن کی شکایات موصول ہوئیں توتحقیقات کی گئیں، یہی کمیٹی مسقبل میں بھی تفتیش کے بعد رپورٹ مرتب کرے گی۔

بیرسٹرسیف نے کہا کہ کمیٹی رپورٹ کے بعد فیصلے کیے جائیں گے، اگرکسی کے پاس ٹھوس ثبوت ہے تووہ کمیٹی کو پیش کرے، کمیٹی کارروائی کے بعد رپورٹ مرتب کرے گی، بانی پی ٹی آئی کی ہدایت ہے کہ متحد رہیں، پارٹی میں انتشاراورگروپ بندی پیداکرنےوالوں کوناکام بنائیں، سوشل میڈیا پروزیراعلیٰ کے پی کے خلاف پروپگنڈے کامؤثرجواب دیں۔