لاہور: چیئرمین پی سی بی محسن نقوی کی ہدایت پر 12 ستمبر سے نیشنل چیمپئن لیگ اقبال اسٹیڈیم میں کرانے کا فیصلہ۔

چیئرمین پی سی بی محسن نقوی کی ہدایت پر نیشنل چیمپئن لیگ اقبال اسٹیڈیم میں کرانے کا فیصلہ کیا گیا ہے جو کہ 12 ستمبر سے شروع ہوگی اور 29 ستمبر تک میچز کرائے جائیں گی۔

نیشنل چیمپئن لیگ میں پانچ ٹیمیں شریک ہوں گی جب کہ چیمپیئن لیگ میں قومی ٹیم کے نامور کھلاڑی بھی حصہ لیں گے۔

پاکستان کرکٹ بورڈ کے وفد کا دورہ فیصل آباد

پی سی بی کے ڈائریکٹر ڈومیسٹک کرکٹ عبداللہ خرم نیازی نے وفد کے ہمراہ اقبال اسٹیڈیم کا دورہ کیا، ڈپٹی کمشنر کیپٹن (ر) ندیم ناصر نے پی سی بی وفد کو اقبال اسٹیڈیم کی اپ گریڈیشن پر بریفنگ دی۔

ڈپٹی کمشنر نے بتایا کہ اقبال اسٹیڈیم کی حالت پہلے سے کافی بہتر نظر آرہی ہے، پویلین بھی بہتر ہیں، ایڈمنسٹریٹر نے اقبال اسٹیڈیم پر اچھا کام کیا ہے، اقبال سٹیڈیم میں جلد انٹرنیشنل کرکٹ کا آغاز ہوگا۔

کیپٹن (ر) ندیم ناصر کا کہنا تھا کہ اقبال اسٹیڈیم میں پی سی بی کی ہدایت پر کام مکمل کرادیا گیا ہے، اقبال اسٹیڈیم نیشنل اور انٹرنیشنل کرکٹ کے لئے تیار ہے۔

واضح رہے کہ پی سی بی کے وفد نے بارہ ستمبر سے نیشنل چیمپئن لیگ کرانے کا فیصلہ کیا ہے جو فیصل آباد کے شائقین کرکٹ کے لئے اچھی خبر ہے۔