سیالکوٹ انٹرنیشنل ایئرپورٹ پر ایف آئی اے امیگریشن حکام میں دو مختلف کارروائیوں میں انسانی اسمگلنگ میں ملوث ملزم سمیت 2 مسافروں کو گرفتار کر لیا۔

گرفتار ملزمان میں عثمان ارشاد اور قاسم علی شامل ہیں، ملزم عثمان ارشاد فلائٹ نمبر ایف زیڈ 315 کے ذرئعے دبئی سے پاکستان پہنچا تھا۔

ملزم کو امیگریشن کلیئرنس کے دوران گرفتار کیا گیا، تحقیقات کے دوران یہ انکشاف ہوا کہ ملزم عثمان انسانی اسمگلنگ میں ملوث ہے،  ملزم گوجرانوالہ کے رہائشی عمیر نامی ایجنٹ کے ساتھ مل کر کام کر رہا ہے۔

ملزم کو دوحہ ائرپورٹ پر جعلی ہسپانوی پاسپورٹ کے ساتھ انسانی اسمگلنگ میں ملوث ہونے پر گرفتار کیا گیا، اس سے قبل بھی ملزم اردن، دبئی اور قطر میں انسانی سمگلنگ کی سرگرمیوں میں ملوث رہا ہے۔

ایک اور کارروائی میں ایف آئی اے امیگریشن حکام نے ملزم قاسم علی کی یونان جانے کی کوشش کو ناکام بنا دیا گیا، ملزم قاسم علی کو امیگریشن کلئیرنس کے دوران مشکوک پایا گیا۔

ملزم نے بتایا کہ وہ عمرے کی غرض سے سعودی عرب جا رہا ہے، ملزم نے سعودی عرب سے یونان جانے کی کوشش کرنا تھی، آئی بی ایم ایس ریکارڈ کے مطابق ملزم نے 2 ماہ قبل بھی جعلی وی وی او سی کارڈ پر یونان جانے کی کوشش کی تھی۔

ملزم کو گزشتہ ماہ جعلی دستاویزات کی بناء پر ترک امیگریشن حکام نے واپس پاکستان بھیجا تھا، ملزم کو فوری کارروائی کرتے ہوئے آف لوڈ کر دیا گیا۔

ملزمان کو بعد ازاں مزید قانونی کاروائی کے لئے اینٹی ہیومن ٹریفکنگ سرکل گوجرانوالہ منتقل کر دیا گیا اور مزید تفتیش جاری ہے۔