اسلام آباد: وزیر پیٹرولیم مصدق ملک نے ایئرکنڈیشنر کے استعمال کوکیپیسٹی پیمنٹس کی بڑی وجہ قرار دے دیا۔

آئی پی پیز کو ہر سال اربوں روپے کی کیپیسٹی کی مد میں ادائیگیوں کے معاملے پر وزیر پیٹرولیم مصدق ملک نے ایئرکنڈیشنر کے استعمال کو کپیسٹی پیمنٹس کی بڑی وجہ قرار دے دیا ہے۔

وزیر پیٹرولیم مصدق ملک نے کہا کہ چند لوگوں کے ایئرکنڈیشنر کے استعمال کے لئے سب پر کیپیسٹی پیمنٹس لگانی پڑتی ہیں، ان ایئر کنڈیشنز کے لیے ہمیں سال بھر کیپیسٹی ادا کرنا پڑتی ہے۔

مصدق ملک کا کہنا ہے کہ اشرافیہ کی ڈیمانڈز کو اب کچھ کم کرنا پڑے گا، کچھ بوجھ تو اب اس اشرافیہ کو بھی اٹھانا پڑے گا۔ کیپیسٹی پیمنٹ بینک کے قرضے کی قیمت ہے، دنیا بھر میں حکومتیں بجلی گیس نہیں خریدتیں لیکن یہاں پر حکومت خریدتی ہے۔

وزیر پیٹرولیم کہتے ہیں کہ ہم پیٹرولیم سیکٹر کی قیمتوں کو ڈی ریگولیٹ کریں گے، اگر عوام کا تحفظ نہ ہوا تو پھر ڈی ریگولیٹ نہیں کریں گے، ملک میں 20 ارب ڈالر کی سرمایہ کاری کی کوشش کررہے ہیں۔

دوسری جانب سینیٹر محسن عزیز کا کہنا ہے کہ اشرافیہ کو ایسے ٹریٹ کریں جیسے ایک عام آدمی کو کیا جاتا یے، آج میں آرہا تھا تو سڑک پر اشرافیہ کی گاڑیاں آتے دیکھیں، اشرافیہ کی گاڑیاں آئیں تو مجھے کہا گیا سائڈ پر ہوجائیں۔