کراچی: سندھ حکومت نے کراچی میں زبردستی اسکولوں کو بند کروانے کی مذمت کردی۔

ترجمان سندھ حکومت گنہور خان اسر کا کہنا ہے کہ شہر قائد کے مختلف علاقوں میں زبردستی اسکولوں کو بند کرنے والی جماعت اسلامی کی غنڈہ گردی قابل مذمت ہے، یہ تعلیمی اداروں پر نہیں بلکہ قوم کے مستقبل اور تعلیم کے تقدس پر براہ راست حملہ ہے۔

ترجمان سندھ حکومت نے کہا کہ تعلیم کی یہ کھلم کھلا رکاوٹ طلباء کے بنیادی حقوق کی خلاف ورزی ہے، قانون کی حکمرانی کو نقصان پہنچانے اور شہریوں میں خوف پیدا کرنے والے ہتھکنڈے برداشت نہیں کیے جائیں گے۔

گنہور خان اسر کا کہنا تھا کہ جبر اور خوف و ہراس کا سہارا لے کر جماعت اسلامی نے ایک بار پھر اپنے حقیقی رنگ دکھائے ہیں، قوم تقسیم اور خوف کے سائے میں گھسیٹنے والی سازشوں کو مسترد کرچکی ہے۔

انہوں نے یہ بھی کہا کہ عوام کی فلاح و بہبود اور ترقی پر اپنے تنگ نظری پر سیاسی مفادات کو  بالاتر رکھنا شرم ناک ہے، قیام پاکستان سے آج تک جماعت اسلامی تاریخ کے غلط رخ پر اور تقسیم کی سیاست میں ملوث رہی ہے۔

ترجمان سندھ حکومت نے کہا جماعت اسلامی کا گذشتہ برسوں سے سیاسی طرز عمل موقع پرستی اور خلل ڈالنے پر مبنی رہا ہے، اپنے تنگ سیاسی اور نظریاتی مقاصد کو قومی مفادات پر ترجیح دینا جماعت اسلامی کی تاریخ رہی ہے۔

گنہور خان اسران مزید کہتے ہیں کہ  کراچی میں جماعت اسلامی کی جانب سے تعلیمی ادارے بند کروانا ان کے دیرینہ تنگ نظر سیاس ایجنڈہ کی مثال ہے، جماعت اسلامی کے حالیہ سیاسی چال بازیاں پاکستان کے بہترین مفادات کی مخالفت کی ان کی طویل تاریخ کا تسلسل ہیں۔