3 سے 4 ستمبر تک پنجاب کے بالائی علاقوں میں شدید بارشوں کے باعث دریاؤں میں طغیانی کا خطرہ، پی ڈی ایم اے پنجاب نے ممکنہ شدید بارشوں کے پیش نظر متعلقہ انتظامیہ و محکموں کو الرٹ جاری کر دیا۔

پی ڈی ایم اے پنجاب نے دریائے جہلم میں منگلہ اپ اسٹریم کے مقام پرپانی کے بہاؤ میں اضافے کی وارننگ جاری کردی۔ پی ڈی ایم اے پنجاب کا دریائے سندھ میں نچلے درجے کے سیلاب کا الرٹ جاری۔

ترجمان کا کہنا ہے کہ 3 ستمبر تک دریائے راوی اور دریائے چناب سے ملحقہ ندی نالوں میں بھی طغیانی کا خدشہ ہے۔ پی ڈی ایم اے پنجاب نے کمشنر گوجرانولہ، سرگودھا، ڈیرہ غازی خان، فیصل آباد، راولپنڈی، گجرات اور ملتان ڈویژنز کو الرٹ جاری کردیا۔

ڈپٹی کمشنرزبھکر، خوشاب، میانوالی، لیہ، کوٹ ادو، مظفر گڑھ، راجن پور، جہلم، گجرات، منڈی بہاؤالدین، سیالکوٹ،  نارووال، حافظ آباد، چنیوٹ، جھنگ، ٹوبہ ٹیک سنگھ اور خانیوال کو بھی الرٹ جاری کردیا گیا۔

ڈی جی پی ڈی ایم اے عرفان علی کاٹھیا نے متعلقہ اضلاع کی انتظامیہ کو اربن فلڈنگ کے پیش نظرالرٹ رہنے کی ہدایت کی ہے۔ بڑے شہروں میں شدید ممکنہ بارشوں کے باعث اربن فلڈنگ کا خدشہ ہے۔

ڈی جی پی ڈی ایم اے کے مطابق ممکنہ سیلابی خطرے کے پیش نظر فلڈ ریلیف کیمپس میں تمام تر بنیادی سہولیات کی فراہمی یقینی بنائی جائے۔ وزیراعلیٰ پنجاب کی ہدایات کے پیش نظر تمام تر انتظامات پیشگی مکمل کریں۔

ڈی جی عرفان کاٹھیا کا کہنا ہے کہ ایمرجنسی کنٹرول رومز میں سٹاف کو الرٹ رکھا جائے۔  ریسکیو 1122 کی ڈائزاسٹر رسپانس ٹیموں کو بھی ہائی الرٹ رکھا جائے۔ عوام الناس کو موجودہ موسمی صورتحال سے لمحہ بہ لمحہ آگاہ رکھا جائے۔

ڈی جی پی ڈی ایم اے کے مطابق عوام جاری کردہ احتیاطی تدابیر پرعمل کریں۔ شہری ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔