لاہور: سابق کوچ و کپتان وقار ہونس کا کہنا ہے کہ ہماری کوشش ہوگی کہ جو کمی کھلاڑیوں میں انٹرنیشنل لیول پر ہے اسے ڈومیسٹک پر ٹھیک کریں۔

پی سی بی چیمپئنز ایونٹ کی ٹیم لائنز کے مینٹور وقار یونس نے پریس کانفرنس کرتے ہوئے کہنا تھا کہ چیئرمین پی سی بی سے بات ہوئی تو انہوں نے چیمپئنز کپ کی بات کی، ہماری پوری کوشش ہوگی کہ کرکٹ کو بہتر کریں۔

انہوں نے کہا کہ میرا اس بار رول انٹرنیشنل نہیں بلکہ ڈومیسٹک کے ساتھ ہے اور ہماری کوشش ہوگی کہ جو کمی کھلاڑیوں میں انٹرنیشنل لیول پر ہے اسے ڈومیسٹک پر ٹھیک کریں۔ ابھی اسکواڈ سے اندازہ لگانا مشکل ہے کہ ٹیم کا کون کپتان ہوگا، وقت کے ساتھ اندازہ ہوگا۔

وقار یونس نے بتایا کہ اسپنرز اور فاسٹ بولرز کے مسائل پر ضرور کام کریں گے، اب جو انٹرنیشنل کرکٹ میں سلیکٹ ہونے کے لئے ایک راستہ بنے گا اس کا مستقبل میں فائدہ ہوگا، پہلے سال کچھ مسائل نظر آئیں گے لیکن مسقبل میں وہ چیزیں بہتر ہوں گی۔

مینٹور کا کہنا تھا کہ اگلے سال چیمپئنزکپ کی اہمیت زیادہ ہوگی، ہمارے پاس ٹیلنٹ موجود ہے لیکن اسے پولش کرنے کی ضرورت ہے لہذا اس ٹورنامنٹ میں کھلاڑیوں کے ورک لوڈ پر کام کیا جائے گا۔

وقار یونس کہتے ہیں کہ چمیپئنز کپ ایک ٹورنامنٹ ہے، چیزیں بہتر کرنے میں وقت لگے گا، میرے وعدے کرنے سے چیزیں بہتر نہیں ہوں گی۔ کھلاڑیوں میں جو کمی ہیں ان کو پورا کرنا ہوگا تاکہ کرکٹ میں بہتری آئے۔

ان کا مزید کہنا تھا کہ کھلاڑیوں کے کیمپ بھی لگائے جائیں گے اور پھر ان کو ریجن کرکٹ بھی کھلائی جائے گی، آج سے دس سال پہلے کہا تھا کہ ڈومیسٹک کو بہتر کرنے کی ضرورت ہے۔