اسلام آباد: حکومت کے اندر ہی بعض حلقے یوٹیلیٹی اسٹورز کارپوریشن کی بندش کے مخالف نکلے۔

حکومتی ذرائع کے مطابق یوٹیلیٹی اسٹورز کارپوریشن کی بندش کے فیصلے کے معاملے پر حکومت کے اندر ہی بعض حلقے یوٹیلیٹی اسٹورز کارپوریشن کی بندش کے مخالف ہیں۔

ذرائع کا کہنا ہے کہ یوٹیلیٹی اسٹورز کارپوریشن کی ایک روپے کا بھی حکومت پر بوجھ نہ ہونے کی نشاندہی ہوئی ہے جب کہ یوٹیلیٹی اسٹورز کو ختم کرنے سے حکومت کو سیاسی اور مالی نقصان کا خدشہ ہے۔

ذرائع نے بتایا کہ یوٹیلیٹی اسٹورز کی بندش کا فیصلہ حکمران جماعت کے ووٹ بینک کو متاثر کرسکتا ہے، یوٹیلیٹی اسٹورز کو بند کرنے سے حکومت کو ٹیکسوں میں سالانہ اربوں روپے کا نقصان ہوگا۔

ذرائع نے کہا کہ یوٹیلیٹی اسٹورز تنخواہوں سمیت دیگر اخراجات کے لیے حکومت پر بوجھ نہیں ہے جب کہ یوٹیلیٹی اسٹورز کارپوریشن اپنے اخراجات خود اپنے وسائل سے پورا کرتی ہے۔

ذرائع نے مزید بتایا کہ یوٹیلیٹی اسٹورز کارپوریشن نے مالی سال 2013 سے 2024 تک 130 ارب روپے کا ٹیکس ادا کیا ہے۔

حکومتی ذرائع کا کہنا تھا کہ حکومتی سبسڈی یوٹیلیٹی اسٹورز کے ذریعے پاکستانی عوام کے لیے ہوتی ہے، یوٹیلیٹی اسٹورز پر کرپشن اور غیر معیاری اشیاء کی شکایات کا ازالہ ہونا چاہیے۔