پاکستان اور امریکہ نے دوطرفہ تعلقات کو مزید مضبوط بنانے کے عزم کا اظہار کیا ہے۔

امریکہ میں پاکستان کے سفیر رضوان سعید شیخ نے امریکی کانگریس میں پاکستان کاکس کے سرکردہ رکن ٹام سوازی سے ٹیلی فونک گفتگو کی۔

ٹیلیفونک گفتگو کے دوران پاکستانی سفیر اور ٹام سوازی نے پاک امریکہ تعلقات، دوطرفہ تعاون کو مزید مستحکم کرنے کے حوالے سے تفصیلی تبادلہ خیال کیا۔

رکن کانگریس ٹام سوازی نے سفیر پاکستان کو امریکہ میں پاکستانی سفیر کی حیثیت سے ذمہ داریاں سنبھالنے پر مبارکباد دی۔

اس موقع پر پاکستانی سفیر نے کہا کہ پاک امریکہ تعلقات دونوں ممالک اور خطے کے لیے انتہائی اہمیت کے حامل ہیں، دونوں ملکوں کے درمیان حالیہ دنوں میں سامنے آنے والی مثبت پیش رفت انتہائی حوصلہ افزا ہے۔

رضوان سعید شیخ کا کہنا تھا کہ خیر سگالی اور دوستی کے اس جذبے کو ہمہ جہتی تعلقات خصوصاً معاشی تعلقات کے فروغ کے لیے بھرپور طریقے سے برؤئے کار لانے کے لیے پرعزم ہیں۔

سفیر پاکستان نے یوم آزادی کے موقع پر نیک جذبات کا اظہار کرنے پر کانگریسی رکن ٹام سوازی کا شکریہ ادا کیا۔

رکن کانگریس ٹام سوازی نے پاک امریکہ تعلقات کی مضبوطی اور امریکہ کے لیے خدمات پر پاکستانی کمیونٹی کی خدمات کو سراہا۔

دوران گفتگو پاک امریکہ تعلقات کو مزید مستحکم کرنے، عوامی روابط کے فروغ کے حوالے سے مل کر کام  کرنے اور امریکی کانگرس میں پاکستانی کاکس کو متحرک و مُستحکم کرنے کے عزم کا اعادہ بھی کیا گیا۔