راولپنڈی : آئی ایس پی آر کے مطابق چیف آف آرمی اسٹاف جنرل سید عاصم منیر نے اورکزئی کا دورہ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف نے وادی تیرہ میں انسداد دہشت گردی آپریشنز میں حصہ لینے والے دستوں سے ملاقات کی، آرمی چیف کو ضم شدہ اضلاع میں سیکیورٹی کی مجموعی صورت حال پر بریفنگ دی گئی۔

ترجمان پاک فوج کا کہنا ہے کہ آرمی چیف کو جاری انٹیلیجنس بیسڈ انسداد دہشت گرد کارروائیوں اور استحکام کے لیے طویل مدتی اقدامات سے اگاہ کیا گیا جب کہ افسروں اور جوانوں سے ملاقات میں آرمی چیف نے ان کے بلند حوصلے اور تمام خطرات کے خلاف دفاع کے لیے تیاریوں کو سراہا۔

پاک فوج کے شعبہ تعلقات عامہ نے کہا کہ آرمی چیف نے تمام دہشت گرد قوتوں کے گٹھ جوڑ کو مکمل شکست دینے کا عزم کرتے ہوئے پاک فوج کے شہداء، غازیوں اور قانون نافذ کرنے والے اداروں کو بھرپور خراج عقیدت پیش کیا۔

آرمی چیف جنرل عاصم منیر نے کہا کہ قوم کی عظیم قربانیوں کی بدولت حاصل ہونے والا امن ہر حال میں برقرار رکھا جائے گا، ہمارے شہداء کی قربانیاں ہمارے عزم اور جذبہ قربانی کو تقویت دیتے ہیں۔

آرمی چیف نے خیبرپختونخوا میں پولیس اور قانون نافذ کرنے والے اداروں کی کاوشوں کو بھی سراہتے ہوئے کہا کہ پاک فوج خیبرپختونخواہ  پولیس اور دیگر قانون نافذ کرنے والے اداروں کو بھرپور اعانت فراہم کرتی رہے گی۔

جنرل عاصم منیر کا کہنا تھا کہ پاک فوج خیبر پختونخواہ پولیس اور قانون نافذ کرنے والے اداروں کو ضم شدہ اضلاع میں فرض کی ادائیگی کے لیے مدد فراہم کرے گی جب کہ چیف آف آرمی سٹاف نے قانون نافذ کرنے والے اداروں کی استعداد کار میں اضافے کی ضرورت پر بھی زور دیا۔

آئی ایس پی آر نے مزید بتایا کہ آرمی چیف نے سیکیورٹی فورسز کی مدد کے حوالے سے مقامی آبادی کے کردار کو بھی سراہا، اورکزئی آمد پر کور کمانڈر پشاور نے آرمی چیف کا استقبال کیا جب کہ  آرمی چیف نے اورکزئی میں یادگار شہداء پر پھول چڑھائے۔