اسلام آباد: جعل سازی پر مبنی ای میل حملوں کے ذریعے سرکاری اداروں اور وزارتوں کو نشانہ بنانے کا انکشاف ہوا ہے۔

نیشنل کمپیوٹر ایمرجنسی رسپانس ٹیم نے سرکاری اداروں کو محتاط رہنے کے لئے ایڈوائزری جاری کردی جس میں کہا گیا ہے کہ منظم جعل سازی ای میل مہم کے ذریعے متعدد سرکاری اداروں کے ای میل سسٹم کو نشانہ بنایا جارہا ہے۔

ایڈوائزری کے مطابق فشنگ ای میلز کے ذریعے دھوکہ دہی پر مبنی لنکس پر کلک کرنے سے سرکاری دستاویز کمپرومائز ہوسکتے ہیں، سرکاری ملازمین کو نشانہ بنانے کے لئے آئی پی ایڈریس اور کلاؤڈ انفراسٹرکچر سے فائدہ اٹھایا جارہا ہے۔

ایڈوائزری مین مزید بتایا گیا کہ حملہ آور سرکاری ملازمین کو نشانہ بنانے کے لئے دھوکہ دہی والے ای میل ایڈریس استعمال کررہے ہیں، ای میل میں منسلک پی ڈی ایف اور لنکس دستاویز جمع کرنے کے لیے ڈیزائن کیے گئے ہیں، فشنک لنکس کے ذریعے سرکاری ملازمین کے یوزر نام اور پاس ورڈ چرائے جارہے ہیں۔

نیشنل سرٹ نے سرکاری اداروں، وزارتوں، ڈویژنز اور ذیلی اداروں کو حملوں سے بچنے کے لئے سائبر سیکیورٹی بڑھانے کی سفارش کرتے ہوئے کہا کہ سرکاری ادارے، وزارتیں اور ان کے ذیلی ادارے اپنے ای میل سیکیورٹی میں اضافہ کریں۔

نیشنل سرٹ کی سفارشات کے مطابق سرکاری ادارے سرکاری دستاویز کی محفوظ ہینڈلنگ کریں اور سرکاری ادارے تھریٹ انٹیلیجنس شیئر کریں تاکہ سائبر حملوں کی روک تھام کی جا سکے۔