نیویارک: اقوام متحدہ کی جنرل اسمبلی کے 79 ویں اجلاس میں فلسطینی صدر محمود عباس نے کہا کہ قابض اسرائیلی فوج اسپتالوں کو بھی نشانہ بنارہی ہے۔

اقوام متحدہ کی جنرل اسمبلی کا 79 واں اجلاس نیویارک میں جاری ہے جس میں خطاب کرتے ہوئے فلسطینی صدر محمود عباس نے کہا کہ نہتے فلسطینی اسرائیل کی جارحیت کا شکار ہیں۔

فلسطینی صدر کا کہنا تھا کہ اسرائیلی بربریت پرعالمی عدالت انصاف نے تاریخی فیصلہ دیا، جنرل اسمبلی نے فلسطین کو ریاست کا درجہ دینے کی قرارداد منظور کی۔

انہوں نے کہا کہ اسرائیل کی جانب سےعالمی قوانین کی دھجیاں اڑائی جارہی ہیں جب کہ فلسطینیوں کی نسل کشی کی جارہی ہے،  فلسطینی عوام کے ساتھ یکجہتی کرنے والوں کا شکریہ ادا کرتے ہیں۔

محمود عباس نے اپیل کرتے ہوئے کہا کہ قابض اسرائیلی فوج اسپتالوں کوبھی نشانہ بنارہی ہے، غزہ میں ہنگامی بنیادوں پر امداد کی فراہمی یقینی بنائی جائے۔

ان کا کہنا تھا کہ اسرائیل کو غزہ کا ایک سینٹی میٹر علاقہ بھی لینے نہیں دیں گے، فلسطین ہمارا وطن ہے اور ہم اسے چھوڑ کر نہیں جائیں گے۔

فلسطینی صدر نے مزید کہا کہ فلسطینی عوام غزہ سے نہیں نکلیں گے، یہ ہمارے باپ دادا کی زمین ہے، فلسطین ہمارا ہے اور ہمارا ہی رہے گا لیکن غاصب اسرائیل غزہ سے ایک دن ضرور نکلے گا۔