وفاقی وزیر داخلہ وانسدا منشیات محسن نقوی نے کہا کہ ایف آئی اے پاکستان کا انتہائی اہم تحقیقاتی ادارہ ہے۔

وفاقی وزیر داخلہ وانسدا منشیات محسن نقوی نے امریکہ کی بیورو آف انٹرنیشنل نارکوٹکس اینڈ لا انفورسمنٹ افیرز( آئی این ایل) کے وفد سے ملاقات کی۔

ملاقات کے دوران محسن نقوی نے کہا کہ پاکستان کی پولیس و پیرا ملٹری فورسز کی استعداد کار بڑھانے میں آئی این ایل غیرمعمولی تعاون فراہم کررہا ہے، اس سلسلے میں کئی اہم منصوبوں پر کام کیا جا رہا ہے جو قابل ستائش ہے،  ہم چاہتے ہیں اس تعاون کو مزید آگے بڑھایا جائے اور پائیدار بنیادوں پر استوارکیا جائے۔

محسن نقوی نے کہا کہ ماسٹر پلان کے ذریعے سب سے پہلے انتہائی اہمیت کے حامل منصوبوں پر توجہ مرکوز کی جائے، چاہتے ہیں کہ ایف آئی اے کو آئی این ایل کے تعاون سے ایف بی آئی کی طرز پر متحرک ادارہ بنایا جائے، جبکہ پاکستان میں جرائم کی سرکوبی کیلئے یہ منصوبہ ایک اہم سنگ میل ثابت ہو گا۔

 محسن نقوی نے ملاقات کے دوران یہ بھی کہا کہ نیشنل پولیس اکیڈمی کی تنظم نوانتہائی ضروری ہے، تاکہ اس کو ایک عالمی معیار کی اکیڈمی بنایا جا سکے، رنٹیر کانسٹیبلری پورے پاکستان میں ریزرو پولیس کا کردار ادا کر رہی ہے، جبکہ اس فورس کو بھی جدید بنیادوں پر استوار کیا جانا وقت کی اہم ضرورت ہے۔

 محسن نقوی نے کہا کہ ان تمام امور میں ہمارے لئے سب سے اہم امریکہ کے تجربے سے استفادہ کرنا ہے، انسداد منشیات کے ضمن میں بھی ہرممکن اقدامات اٹھائے جا رہے ہیں۔

دوسری جانب امریکی وفد نے دہشت گردی کے حالیہ واقعات میں قیمتی انسانی جانوں کے ضیاع پر افسوس کا اظہارکیا۔

ملاقات میں امریکی نائب سفیر نے کہا کہ آئی این ایل 42 سال سے حکومت پاکستان کے ساتھ مل کر کام کر ہا ہے، چاہتے ہیں کہ اس تعاون مزید مضبوط اور پائیدار بنایا جائے۔

امریکی نائب سفیر کی جانب سے اس عزم کا بھی اظہارکیا گیا کہ پاکستان کی سیکیورٹی میں ہی امریکہ کی سیکیورٹی ہے۔

وفاقی وزیرداخلہ و انسداد منشیات سے ملاقات کرنے والے وفد میں امریکہ کی نائب سفیر نیٹلی بیکر، کنٹری ڈائریکٹر آئی این ایل لائن نیلسن، پولیس ایڈوائزر ایڈ پریسٹن اور پولیس پروگرام سپیشلسٹ فیصل گل تھے۔