وزیر اطلاعات پنجاب عظمیٰ بخاری نے کہا کہ تحریک انصاف کے ڈی این اے میں پاکستان مخالف جراثیم دوڑتے ہیں۔

وزیر اطلاعات پنجاب عظمیٰ بخاری نے برسٹرسیف کے بیان پرردعمل دیتے ہوئے کہا کہ برسٹر سیف کا بھارتی وزیر خارجہ کو ریاست مخالف احتجاج میں شرکت کی دعوت دینا ملک دشمنی کا آخری لیول ہے۔

عظمیٰ بخاری نے کہا کہ دیکھتے ہیں کہ اسرائیلی مددگاروں کو احتجاج کی دعوت کب ملتی ہے؟ ان لوگوں میں ملکی وقار، ملکی سالمیت اور خود مختاری جیسی سوچ دور تک موجود نہیں۔

 عظمیٰ بخاری نے کہا کہ یہ اپنے عزائم سے ثابت کرتے ان کا مشن ملکی جڑوں کو کھوکھلا کرنا ہے، فتنہ پارٹی کے ریاست مخالف احتجاج میں افغان شہریوں کی شرکت کئی سوالات کھڑے کر رہی ہے۔

عظمیٰ بخاری نے یہ بھی کہا کہ اسلام اباد سے بڑی تعداد میں فتنہ پارٹی کے احتجاج میں شریک افغان شہریوں کی گرفتاری ان کے عزائم بے نقاب کرتی ہے، اڈیالہ جیل کے قیدی نے قسم کھائی ہے پاکستان میں امن اور خوشحالی قائم نہیں رہنے دینی۔

عظمیٰ بخاری نے کہا کہ اس فتنے کے لیے اسرائیلی، افغانی اور بھارتی لابیاں مرے جا رہی ہیں، پنجاب کے عوام باشعوراور عقلمند ہیں اسی لیے پنجاب کے لوگوں نے اڈیالہ جیل کے قیدی کے بیانیہ کو مسترد کردیا ہے، جبکہ خیبر پختونخواہ کے عوام کے حالات قابل رحم ہیں ان کے لیے دعا گو ہیں وہ جلد اس فتنے کی حقیقت دیکھیں۔