لاہور: وزیراعلیٰ پنجاب مریم نواز شریف نے کہا ہے کہ حکومت غیر ملکی سرمایہ کاروں کو پاکستان میں سیکیورٹی سمیت تمام سہولتوں کی فراہمی یقینی بنا رہی ہے۔

وزیراعلیٰ مریم نواز سے پاکستان میں ارجنٹائن کے سفیر سیباسٹین سیوس کی ملاقات ہوئی جس میں لائیو اسٹاک، زراعت، انفارمیشن ٹیکنالوجی اور دیگر صنعتی شعبوں میں تعاون کے فروغ پر تبادلہ خیال کیا گیا۔

ملاقات کے دوران اوکاڑہ میں سائلوز کا پائلٹ پراجیکٹ لانچ کرنے پر بھی اتفاق کیا گیا۔

اس موقع پر مریم نواز نے گفتگو کرتے ہوئے کہا کہ پاکستان اور ارجنٹائن کے مابین دو طرفہ تعلقات بہتری کی جانب گامزن ہیں، دونوں ممالک کے درمیان بزنس ٹو بزنس انٹر ایکشن بڑھانے کیلئے اقدامات کیے جائیں گے۔

انہوں نے کہا کہ ارجنٹائن کی میٹ پروسیسنگ ٹیکنالوجی سے استفادہ کرنا چاہتے ہے، لائیو اسٹاک، کھیلوں کا سامان اور سرجیکل آلات کے شعبے میں ارجنٹائن سےتجارت کو مزید فروغ دینے کی ضرورت ہے۔

 وزیراعلیٰ نے مزید کہا کہ حکومت غیر ملکی سرمایہ کاروں کو پاکستان میں سیکیورٹی سمیت تمام سہولتوں کی فراہمی یقینی بنا رہی ہے، پنجاب میں مختلف شعبوں میں سرمایہ کاری کے بے پناہ مواقع سے فائدہ اٹھا یا جا سکتا ہے۔

دوسری جانب ارجنٹائن سفیر کا کہنا تھا کہ زراعت، فارماسیوٹیکل، انفارمیشن ٹیکنالوجی اور صنعتی شعبوں میں تعاون کو مزید فروغ دیا جائے گا، لائیو اسٹاک اور بائیو ٹیکنالوجی کے شعبے میں پنجاب کے ساتھ کام کرنا چاہتے ہیں۔

انہوں نے مزید کہا کہ تجارت کے فروغ کیلئے گورنمنٹ ٹو گورمنٹ اور بزنس ٹو بزنس کوآرڈینیشن بہتر بنانے کے لئے کردار ادا کریں گے، فوڈ سیکیورٹی کے شعبے میں بھی پنجاب کو تکنیکی معاونت فراہم کریں گے۔

واضح رہے کہ ارجنٹائن کی ڈپٹی ہیڈ آف مشن ایریکا لوسیرو ،سینیٹر پرویز رشید اور چیف سیکریٹری زاہد اختر زمان بھی اس موقع پر موجود تھے۔