ترجمان دفتر خارجہ کا کہنا ہے کہ دہشتگردی کی کارروائی، پاکستان اور چین کی پائیدار دوستی پر حملہ ہے۔

ترجمان دفتر خارجہ ممتاز زہرہ بلوچ نے کراچی ایئرپورٹ کے قریب چینی شہریوں پر دہشت گردوں کے حملے کی شدید مذمت کرتے ہوئے کہا کہ دہشت گردوں کا افسوسناک حملہ نہ صرف پاکستان پر تھا بلکہ پاکستان اور چین کی دوستی کو بھی نشانہ بنایا گیا۔

ترجمان دفتر خارجہ نے کہا کہ حملے میں 2 چینی انجینئرز جاں بحق اور  ایک  زخمی ہوا۔ زخمیوں کی جلد صحت یابی کے لیے دعا گو ہیں۔

ترجمان دفتر خارجہ نے کہا کہ پاکستان  بزدلانہ حملے میں ملوث عناصر کو انصاف کے کٹہرے تک پہنچانے کے لیے پرعزم ہے۔پاکستان کی سیکیورٹی فورسز اور قانون نافذ کرنے والے ادارے حملے کے ذمہ داروں اور سہولت کاروں کو انجام تک پہنچانے میں کوئی کسر اٹھا نہ رکھیں گے۔

انہوں نے مزید کہا کہ پاکستان اور چین قریبی شراکت دار اور برادران آہن ہیں، وزارت خارجہ چینی سفارت کے ساتھ مکمل رابطے میں ہے۔

ترجمان دفتر خارجہ کا کہنا تھا کہ پاکستان اور چین باہمی احترام اور مشترکہ منزل کے حصول کے بندھن میں بندھے ہیں۔

ترجمان دفتر خارجہ نے کہا کہ پاکستان چینی باشندوں، منصوبوں اور اداروں کی اپنی سرزمین پر سلامتی اور تحفظ کے لیے پرعزم ہے۔ پاکستان چینی بھائیوں کے ساتھ مل کر دہشت گردی کی قوتوں کو ناکام بنانے کے لیے کام کرتا رہے گا۔