اسلام آباد: آئینی ترامیم کے معاملے پر مسلم لیگ (ن) کے قائد میاں نواز شریف اور جے یو آئی کے سربراہ مولانا فضل الرحمان کی جلد ملاقات طے پا گئی۔

ذرائع کے مطابق مولانا فضل الرحمان سے میاں نوازشریف اسلام آباد میں ملاقات کریں گے، مولانا فضل الرحمان کے کراچی سے اسلام آباد واپس آتے ہی ملاقات کا دن اور وقت طے کیا جائے گا۔

حکومتی پارلیمانی ذرائع نے دعوی کیا ہے کہ حکومت نے مولانا فضل الرحمان کی تجویز مان لی، پارلیمنٹ کے دونوں ایوانوں کا اجلاس ایس سی او سربراہ کانفرنس کے بعد بلانے کا فیصلہ کیا جارہا ہے۔

ذرائع کے مطابق مولانا فضل الرحمان آئینی ترمیم پر اپنا مسودہ دو سے تین دن میں حکومتی ٹیم کے حوالے کریں گے، پیپلز پارٹی اور ن لیگ کی قانونی ٹیم اپنا مسودہ جے یو آئی سے شیئر کرے گی۔

حکومتی ذرائع کا کہنا ہے کہ مولانا نے آئینی عدالت کے قیام پر مشروط رضا مندی ظاہر کی ہے، جے یو آئی کے مسودے میں سپریم کورٹ کے چیف جسٹس کی سربراہی میں ہی پانچ سینئر ججوں پر مشتمل آئینی بینچ کی تشکیل کی ترمیم بھی شامل ہے۔

ذرائع نے مزید بتایا کہ حکومتی اتحاد اگر آئینی عدالت پر زور دے گا اور مولانا کی دیگر ترامیم عملی طورپر مان لے گا تو مولانا بھی آئینی عدالت پر لچک پیدا کرسکتے ہیں۔