کراچی: لبنان سے پاکستانیوں کو لانے والی خصوصی پرواز کراچی پہنچ گئی جبکہ خصوصی پرواز سے 70 پاکستانی شہری وطن واپس پہنچے۔

لبنان میں پھنسے پاکستانیوں کو لیکر آنے والی خصوصی پرواز نے کراچی ایئرپورٹ پر لینڈ کیا، غیر ملکی ایئرلائن کی خصوصی پرواز پاکستانیوں کو لیکر وطن پہنچی، ایئرپورٹ پر لبنان سے آنے والے ہم وطنوں کیلئے خصوصی انتظامات کیے گئے تھے۔

کراچی ایئرپورٹ پر موجود گورنر سندھ کامران ٹیسوری، وفاقی وزیر خالد مقبول صدیقی اور صوبائی وزیر جام اکرام نے وطن واپس آنے والے پاکستانیوں کا استقبال کیا۔

اس موقع پر گورنر کامران ٹیسوری نے گفتگو کرتے ہوئے کہا کہ حکومت نے لبنان سے پاکستانیوں کی بحفاظت وطن واپسی ممکن بنائی، جو پاکستانی وہاں رہ گئے ہیں ان کی واپسی کیلئے انتظامات کیے ہوئے ہیں، جو پاکستانی واپس آنا چاہتے ہیں اس کے لئے حکومت انتظامات کرے گی۔

انہوں نے کہا کہ مسلم ممالک اسرائیل کے خلاف یک آواز ہوں تاکہ لبنان پر مسلط جنگ رکے، اسرائیل نے جنگ فلسطین سے لبنان تک پھیلادی مگر دنیا خاموش ہے۔

دوسری جانب خالد مقبول صدیقی کا کہنا تھا کہ پوراخطہ اس وقت حالت جنگ میں ہے، لبنان میں پھنسے پاکستانیوں کی واپسی مشکل مرحلہ ہے، حکومت اور اداروں نے بہترین انتظامات کیےہیں، حکومت پاکستانیوں کی وطن واپسی کی ذمہ داری پوری کرے گی۔