لاہور: صوبائی وزیر اطلاعات عظمیٰ بخاری نے کہا ہے کہ پنجاب حکومت کا پی آئی اے کو خریدنے کا کوئی ارادہ نہیں ہے۔

وزیر اطلاعات پنجاب عظمیٰ بخاری نے نیوز کانفرنس کرتے ہوئے کہا کہ حکومت کا کام کاروبار کرنا نہیں، ابھی کوئی ایئر لائن لانچ کرنے کی بھی تجویز زیرغور نہیں۔

انہوں نے کہا کہ کے پی کا خط آیا کہ وہ پی آئی اے خریدنے میں دلچسپی رکھتے ہیں، کےپی والے پتہ نہیں کون سی پی آئی اے سمجھ رہے ہیں، خیبرپختونخوا ہزار ارب روپے کا مقروض صوبہ ہے، کے پی میں کوئی نیا اسکول یا اسپتال نہیں بنا۔

عظمیٰ بخاری نے کہا کہ اسموگ کی صورتحال کو مانیٹر کیا جارہا ہے، اسکولوں میں چھوٹے بچوں کو چھٹیاں دی گئی ہیں، اسموگ لاک ڈاؤن کو مانیٹر کیا جارہا ہے، ہوا کا رخ تبدیل ہوگیا، دہلی کا اے کیو آئی انڈیکس 393 ہے، شہری غیرضروری گھروں سے نہ نکلیں، لاہورمیں ایئر کوالٹی انڈیکس آج 280 ہے۔

انکا کہنا تھا کہ ہم سرپلس بجٹ کی طرف جائیں گے، پنجاب کا 600 ارب سے زائد کا سرپلس بجٹ کا ہدف ہے، پنجاب واحد صوبہ ہے جو سرپلس کی طرف جارہا ہے۔

صوبائی وزیر نے مزید کہا کہ ٹی بلز میں 200ارب روپے کی سرمایہ کاری کی، پنجاب نے اپنے اخراجات پر قابو پایا، ایک فساد پارٹی ٹی بلز کے معاملے کو اچھال رہی ہے، ایک فساد پارٹی اپنا صوبہ چلانے کے قابل نہیں، 30 جون کو 630 ارب روپے کا سرپلس بجٹ دیں گے۔