وزیر اعظم شہباز شریف نے گلگت بلتستان میں مختلف منصوبوں کی تعمیر کا سنگ بنیاد رکھ دیا۔

وزیراعظم نے گلگت بلتستان میں علاقائی گرڈ کی تعمیر کے علاوہ گریٹر واٹر سپلائی ہنزہ کے منصوبے کا سنگ بنیاد رکھا۔

گلگت بلتستان میں ترقیاتی منصوبوں کے سنگ بنیاد اور افتتاح کی تقریب سے خطاب کرتے ہوئے وزیر اعظم شہباز شریف نے کہاکہ غذر کے علاقے میں قدرتی آفت آئی وہاں گاؤں کا نشان مٹ گیا تھا۔

انہوں نے کہا کہ اگست 2022 میں جب وہاں کا دورہ کیا تو سکتہ طاری ہوا، دورے کے دوران اس گاؤں کی تعمیر کیلئے احکامات دیے تھے۔

ان کا کہنا تھا کہ آج اطمینان ہوا کہ گاؤں کے افراد کو گھر مل گئے، ایک خاندان میں قوم کی بیٹی کے ساتھ صرف والد زندہ بچے۔

وزیر اعظم نے کہا کہ قوم کی بیٹی کیلئے حکومت نے 50 لاکھ روپے اکاؤنٹ میں جمع کرائے تھے، وہ 50 لاکھ روپے آج 67 لاکھ روپے بن چکے ہیں۔

ان کا کہنا تھا کہ گلگت بلتستان کے حوالے سے بہت تفصیلی میٹنگز ہوئی ہیں، اجلاسوں میں بجلی اور پانی کے مسائل سمیت تعلیم پر بھی بات ہوئی، سڑکوں اور انفرااسٹرکچر کے حوالے سے کئی معاملات پر سیر حاصل گفتگو ہوئی۔

انہوں نے کہا کہ اجلاسوں میں ٹھوس فیصلے کیے گئے، سنگ بنیاد رکھے جانے والے منصوبوں میں 2 پن بجلی پروجیکٹ شامل ہیں، بلتستان اور قراقرم یونیورسٹی کیلئے 50،50 کروڑ روپے کے فنڈز مختص کیے ہیں، کئی منصوبے تعمیر کے مرحلے سے گزر رہے ہیں۔