لاہور: کوئٹہ ریلوے اسٹیشن پر بم دھماکے اور جانوں کے ضیاع کی بھرپور مذمت کے لئے پنجاب اسمبلی میں قرارداد جمع کرا دی گئی ہے۔

قرارداد آئی پی پی کے صوبائی جنرل سیکریٹری اور پی پی 149 سے ایم پی اے شعیب صدیقی نے پنجاب اسمبلی میں جمع کرائی، جس میں غیر ملکی ایجنسیوں کی پاکستان میں مداخلت اور دہشت گردی کی کارروائیوں کی مذمت کی گئی۔

شعیب صدیقی کی قرارداد میں 27 ہلاکتوں پر اظہار افسوس کیا گیا اور 50 سے زائد زخمیوں کی جلد صحتیابی کے لئے دعا کی گئی ہے۔

ایم پی اے کی قرارداد کے متن میں کہا گیا کہ پنجاب اسمبلی کا یہ ایوان ملک کی تمام صوبائی اکائیوں کو یک جان سمجھتا ہے، یہ ایوان اعادہ کرتا ہے کہ ملک کے چپے چپے کی حفاظت کے لئے  قوم پاک فوج کے شانہ بشانہ کھڑی کے۔

ایوان نے عسکری اداروں پر اعتماد کا اظہار کرتے ہوئے کہا کہ یقین ہے دہشت گردی کے خلاف جنگ جیت کر ملک میں امن و امان قائم کریں گے۔

ایم پی اے شعیب صدیقی کا کہنا تھا کہ صدر استحکامِ پاکستان پارٹی عبدالعلیم خان کی قیادت میں ملکی تعمیر و ترقی میں حصہ ڈال رہے ہیں، ظلم کی رات جلد ہی امن کے اجالوں میں ڈھل جائے گی، شہداء کے خاندانوں سے اظہار ہمدردی کرتے ہیں۔

شعیب صدیقی نے دعا کرتے ہوئے کہا کہ اللہ تعالیٰ شہداء کے درجات بلند فرمائے اور زخمیوں کو جلد صحتیاب کرے، تاہم قرارداد کا مقصد ایوان میں دہشتگردی کے خلاف موقف کو اجاگر اور قومی اتحاد کا اظہار کرنا ہے۔