لاہور میں بڑھتی اسموگ کے پیش نظر بیرونی سرگرمیوں پر پابندی عائد کردی گئی ہیں، جس کا نوٹیفکیشن بھی جاری کردیا گیا ہے۔

نوٹیفکیشن کے مطابق ضلعی انتظامیہ فضائی آلودگی اور اسموگ پر قابو پانے کیلئے کوشاں ہے، 11 نومبر سے تجارتی مارکیٹس اور بیرونی سرگرمیاں بند رہیں گی۔

انوائرمنٹ پروٹیکشن ایجنسی کے تحت آلودگی کے خلاف احتیاطی اقدامات جاری کیے گئے ہیں، خلاف ورزی پر پنجاب انوائرمنٹل پروٹیکشن ایکٹ 1997 کے تحت کارروائی ہوگی۔

نوٹیفکیشن میں بتایا گیا ہے کہ ہر قسم کی کھیلوں، نمائشوں، تقریبات اور ریسٹورنٹس کی ڈائننگ پر پابندی عائد کردی گئی ہے جبکہ مذہبی اجتماعات بھی مستثنیٰ کردیے گئے ہیں۔

نوٹیفکیشن کے مطابق دکانیں، مارکیٹیں اور شاپنگ مالز رات 8 بجے بند ہوں گے جبکہ میڈیکل اسٹورز، لیبارٹریز، پیٹرول پمپس اور کریانہ اسٹورز مستثنیٰ ہوں گے۔

نوٹیفکیشن میں مزید کہا گیا کہ بڑے ڈپارٹمنٹل اسٹورز میں صرف گراسریز اور میڈیکل سیکشن کھلے رہیں گے، ان احکامات کی خلاف ورزی پر دفعہ 188 کے تحت سزا دی جائے گی، یہ احکامات 11 نومبر سے 17 نومبر تک نافذ العمل رہیں گے۔

ڈپٹی کمشنر لاہور نے عوام سے اسموگ کے دوران احتیاطی تدابیر اختیار کرنے کی اپیل کی اور کہا کہ شہری غیر ضروری باہر نکلنے سے گریز کریں اور ماسک کا استعمال یقینی بنائیں۔

ڈی سی لاہور کا کہنا تھا کہ اسموگ کے باعث سانس کی بیماریوں سے بچنے کے لئے احتیاطی تدابیر اختیار کریں، بچوں، بزرگوں اور بیمار افراد کو خاص طور پر اسموگ سے محفوظ رکھیں۔

ڈپٹی کمشنر نے اپیل کی کہ اسموگ کے دوران گھروں میں رہیں اور باہر نکلنے سے گریز کریں اور گاڑیوں کی غیر ضروری استعمال سے گریز کریں اور پبلک ٹرانسپورٹ کا استعمال کریں۔

انہوں نے مزید کہا کہ فضائی آلودگی کے باعث شہریوں کی صحت کا خیال رکھنا اولین ترجیح ہے، شہریوں کا تعاون ہماری کامیابی کی ضمانت ہے، مل کر اسموگ کا مقابلہ کریں۔