وفاقی وزیر توانائی سردار اویس لغاری کا کہنا ہے کہ آئندہ چند ماہ میں بجلی کی قیمتیں کم ہوں گی۔

بول نیوز کے پروگرام ’تبدیلی‘ میں سینئر تجزیہ نگار اور اینکر پرسن ڈاکٹر دانش کے ساتھ گفتگو کرتے ہوئے وفاقی وزیر کا کہنا تھا کہ ہم نے اصلاحاتی پروگرام کا آغاز کیا ہے۔

اویس لغاری نے کہا کہ پروفیشنل بنیادوں پر اقدامات کئے ہیں، ٹرانسمیشن لائن کی خرابیوں کو دور کیا ہے، ہم نے بڑی انقلابی اصلاحات کی ہیں۔

انہوں نے کہا کہ آئندہ چندماہ میں بجلی کی قیمتیں کم ہوں گی، جہاں بجلی چوری ہوگی وہاں لوڈشیڈنگ ہو گی۔

وفاقی وزیر کا کہنا تھا کہ اوور بلنگ میں بڑی حدتک کمی آئی ہے، اوور بلنگ قطعی قابل قبول نہیں ہے۔

انہوں نے کہا کہ ہم کب تک کےالیکٹرک کی سبسڈی کا بوجھ اٹھائیں گے، باقی ملک سے کےالیکٹرک کی بجلی مہنگی ہے، کے الیکٹرک کے حوالے سے بڑی شکایات ہیں۔

ان کا کہنا تھا کہ نیلم جہلم پروجیکٹ میں بڑانقصان ہوا، سال کے آخر میں گردشی قرضے کم ہو جائیں گے، طلب کم ہونے کی وجہ سے کیپسٹی چارجز کا بوجھ ہے۔

وفاقی وزیر نے کہا کہ کیپسٹی چارجز کے بغیر قرضے کم نہیں ہوں گے، 2018 کے روپے کی قدر میں کمی ہوئی، ملکی معیشت میں بہتری آرہی ہے۔

انہوں نے کہا کہ بھاشا اور مہمند ڈیم پر کام چل رہا ہے جبکہ 5 آئی پی پیز کو سسٹم سے نکال دیا گیا ہے۔

وفاقی وزیر توانائی سردار اویس لغاری نے مزید کہا کہ امپورٹڈ کول کی جگہ تھر کول کے استعمال سے بچت ہو گی، الیکٹرک گاڑیوں کیلئے چارجنگ اسٹیشن بنائیں گے۔