وزیر اطلاعات عطا تارڑ نے آج اسلام آباد کے مختلف علاقوں کا دورہ کیا اور شہر اقتدار کی صورتحال کا جائزہ لیا۔

وزیراطلاعات عطاتارڑ نے اسلام آباد کے مختلف مقامات کے دورے کے دوران میڈیا سے گفتگو کرتے ہوئے کہا کہ شہر میں امن و امان کی صورتحال کو برقرار رکھنے کے لئے حکومت ہر ممکن کوشش کر رہی ہے۔ انہوں نے کہا کہ اسلام آباد میں راستے کھلے ہیں اور شہر میں کوئی مشکلات نہیں ہیں۔

عطاتارڑ نے پی ٹی آئی پر تنقید کرتے ہوئے کہا کہ پی ٹی آئی کے بہت سارے لوگ نہیں چاہتے کہ پارٹی کے سربراہ عمران خان باہر آئیں، اور وہ سرکاری املاک کو نقصان پہنچانے میں ملوث ہیں۔ وزیر اطلاعات نے مزید کہا کہ پی ٹی آئی کے رہنما خود گرفتاریوں دے رہے ہیں اور حکومت کسی کو بھی امن خراب کرنے کی اجازت نہیں دے گی۔

وزیراطلاعات نے کہا کہ پی ٹی آئی کے رہنماؤں نے کہا ہے کہ وہ انتشار نہیں پھیلانا چاہتے، لیکن راستوں کی بندش کی ذمے داری پی ٹی آئی پر عائد ہوتی ہے۔ انہوں نے مزید کہا کہ تحریک انصاف بلاوجہ احتجاج کر رہی ہے اور انتشار پھیلانے والوں کو گرفتار کیا جائے گا۔

عطاتارڑ نے اعلان کیا کہ آج بیلاروس کا ایک وفد اسلام آباد پہنچ رہا ہے اور بیلاروس کے صدر بھی جلد پاکستان کا دورہ کریں گے۔ ان کا کہنا تھا کہ حکومت کا اولین مقصد شہر کا امن برقرار رکھنا ہے اور وہ اس میں کامیاب رہیں گے۔

انہوں نے کہا کہ لشکرکشی کرنے والے افراد کے درمیان آپسی لڑائی ہے اور پی ٹی آئی نے پہلے بھی ملک میں انتشار پھیلایا تھا۔ وزیر اطلاعات نے اس بات پر بھی زور دیا کہ کرم کے لوگوں کی کسی کو فکر نہیں، اور عوام کو ریلیف پہنچانے کے لئے حکومت بجلی کے بلوں میں کمی کی کوششیں جاری رکھے گی۔

وزیراطلاعات نے وزیرداخلہ محسن نقوی کی تعریف کرتے ہوئے کہا کہ وہ امن و امان کو یقینی بنا رہے ہیں۔