سکھر: وزیر توانائی سندھ ناصر حسین شاہ نے پی ٹی آٗئی پر تنقید کرتے ہوئے کہا کہ مظاہرین تین دن میں اسلام آباد پہنچے اور پھر تین منٹ میں بھاگ گئے جو ان کی ناکامی اور بزدلی کا واضح ثبوت ہے۔

صوبائی وزیر توانائی سندھ سید ناصر حسین شاہ نے سکھر میں میڈیا سے گفتگو کرتے ہوئے کہا کہ اج کل ملک کی صورتحال سب کے سامنے ہے اور یہ وقت ثابت کر رہا ہے کہ ملک میں انتشار پھیلانے والی ایک ٹولی سرگرم ہے جب کہ یہ ٹولہ صرف ملک میں انتشار پھیلانے کا کام کررہا ہے۔

ناصر حسین شاہ نے پی ٹی آئی کے حالیہ احتجاجی مظاہروں پر تبصرہ کرتے ہوئے کہا کہ مظاہرین تین دن میں اسلام آباد پہنچے اور پھر تین منٹ میں بھاگ گئے جو ان کی ناکامی اور بزدلی کا واضح ثبوت ہے۔

وزیر توانائی سندھ نے محسن نقوی کی تعریف کرتے ہوئے کہا کہ وزیر داخلہ نے انتہائی تحمل اور حکمت سے ایک اہم مسئلے کو حل کیا اور اس پر وہ خراج تحسین کے مستحق ہیں۔

انہوں نے یہ بھی کہا کہ فورسز نے صرف تین سے دس منٹ میں ریڈ زون کو کلیئر کیا جس سے ظاہر ہوتا ہے کہ حکومت کی انتظامیہ مضبوط اور منظم ہے۔

ناصر حسین شاہ نے پی ٹی آئی کے رہنماؤں پر تنقید کرتے ہوئے کہا کہ پی ٹی آئی کے جو رہنما اپنے لیڈر کو چھڑانے کے لیے اسلام آباد آئے تھے، وہ کارکنان کو گرفتار کروا کر بھاگ گئے اور ان کی یہ حرکت ظاہر کرتی ہے کہ ان کا مقصد صرف انتشار پھیلانا تھا۔

انہوں نے کہا کہ وہ جو این آر او مانگ رہے ہیں، ایسا کچھ بھی نہیں ہونے والا، پی ٹی آئی کے لیڈر کو عدالتوں سے ریلیف مل سکتا ہے مگر کسی دوسری صورت میں نہیں۔

انہوں نے مزید کہا کہ اگر پی ٹی آئی امن و سکون کی پالیسی اپنائے گی تو ان کے مسائل حل ہو سکتے ہیں لیکن اگر وہ تخریبی کارروائیوں میں ملوث رہیں گے تو ان کے مسائل بڑھتے ہی جائیں گے۔

ناصر حسین شاہ نے پی ٹی آئی کے احتجاجی انداز پر تبصرہ کرتے ہوئے کہا کہ گورنمنٹ نے پی ٹی آئی کو احتجاج کے لیے مخصوص جگہیں دینے کی پیشکش کی تھی لیکن ان کی طرف سے ‘میں نہ مانوں’ کی پالیسی اختیار کی گئی۔