احتساب عدالت اسلام آباد نے بانی پی ٹی آئی اور بشریٰ بی بی کے خلاف 190 ملین پاؤنڈ کیس کی سماعت بغیر کارروائی کے ملتوی کردی۔

عدالت نے بانی پی ٹی آئی اور بشریٰ بی بی کے خلاف 190 ملین پاؤنڈ کیس کی سماعت 2 دسمبر تک ملتوی کردی۔

سماعت احتساب عدالت کے جج ناصرجاوید رانا کی عدم دستیابی کے باعث ملتوی کی گئی۔ آج بانی پی ٹی آئی اور بشریٰ بی بی کا 342 کا بیان اڈیالہ جیل میں ریکارڈ ہونا تھا۔

دوسری جانب اسپیشل سینٹرل عدالت لاہور میں پرویزالٰہی سمیت دیگر کیخلاف ایف آئی اے منی لانڈرنگ کے مقدمے کی سماعت ہوئی۔ اسپیشل سینٹرل عدالت کے جج تنویراحمد شیخ نے سماعت کی۔

سابق وزیراعلی پنجاب چوہدری پرویزالہی عدالت میں پیش نہیں ہوئے۔ پرویزالہی کے وکیل عامرسعید راں ایڈووکیٹ نے ایک روزہ حاضری معافی کی درخواست دائر کی۔

عدالت نے پرویز الٰہی کی ایک روزہ حاضری معافی کی درخواست منظورکرلی۔

وکیل درخواست نے مؤقف اپنایا کہ پرویزالہی کی طبیعت ناساز ہے ڈاکٹرز نے آرام کا مشورہ دیا ہے، استدعا ہے کہ عدالت ایک روزہ حاضری معافی کی درخواست منظورکرے۔

شریک ملزمہ زہرا الٰہی کے پلیڈررانا فرخ امین ان کی جگہ حاضری کیلیے پیش ہوئے ہیں۔ پرویز الٰہی کی بہو زہرا الہیٰ منی لانڈرنگ کیس میں نامزد ملزمہ ہیں۔

عدالت نے زہرا الہی کو پردہ نشین خاتون ہونے کے باعث حاضری سے مستقل استثنی دے رکھا ہے۔